AMC Multi Complex hawn a ni

Aizawl Municipal Corporation (AMC)-in chéng vbc. 10.59 sénga Tuikual South-a an sak AMC Multi Complex chu July 5, Nilaini khan Aizawl mayor Lalrinenga Sailo-in a hawng.

AMC Multi Complex hi Property Tax tling khawm leh AMC fund dangte bakah, AMRUT aṭanga hmuh sumte hmangin sak a ni a, August 18, 2017-ah sak ṭan niin, March 13, 2023 khan zawh a ni.UT Building ṭhin, a hlui tawh avanga luah ngam tawh loh chu AMC-in Mizoram sorkara GAD phalnain an ṭhiat a, AMRUT fund nuai 296 hmangin lirthei hûnna (parking) atan sak a ni a, AMC sum hmangin sak chhunzawm a ni.

Lalrinenga Sailo chuan, khawpui ro tling siam turin AMC-in chak taka hma a lak thu sawiin, "AMC hi mahnia inchâwm thei tura tih a nih avangin Central sorkar aṭanga sum dawn a tlem telh telh a, chuvangin, sum (revenue) lut thei thil ro tling siam turin theih­tawp a chhuah zel a ni," a ti a; Complex enkawlnaah AMC bakah Tuikual South mipui an pawimawh tur thu a sawi.

Aizawl Mayor chuan, Multi Complex chu mi tam tak tana malsawmna thlentu tur, eizawnna tam tak siamtu tur a nih thu a sawi a; lirthei dahna leh bazar hmun tur a nih angin Assembly House bul kawng síra inpho ṭhinte nuam zawka an ṭhut theihna tur ruahman a nih thu a sawi bawk.

AMC Multi Complex hawnnaah hian deputy mayor R Thanglura, AMC corporator-te leh hotu dangte bakah, Tuikual South khawtlang hruaitute an tel a ni.