Ruihhlo do kawngzawh huaihawt

Mamit District Level Nasha Mukt Bharat Campaign chuan nimin khan Mamit Charkawn leh Mamit Field Veng inkarah ruihhlo do beihpui thlâk kawngzawh an huaihawt a, Mamit bialtu MLA H Lalzirliana'n a vailiam.

Nasha Mukt Bharat Campaign puala kawngzawhah hian zirlai, sorkar hnathawk leh tlawmngai pawl aiawh mi ṭhahnem tak an tel a; ruihhlo do tura intiamna signature campaign an nei nghal a ni.

H Lalzirliana chuan, Mamit district chu India rama ruihhlo do ngaihna bik district 372 zingah a tel thu sawiin, "Ruihhlo tawlh rûk kalká leh a tamna hmun kan lo ni ta reng mai a, a chhuanawm lo hle. Police-te leh thawktu hrang hrang hmalakna zarah hman ni lawkah tam tham tak man a ni a, man loha relhruk tam tak a awm dawn a, ruihhlo do tura hma kan lak a ṭul tak zet tawh a ni," a ti.

Mizo ṭhalaite ruihhlo/damdawi tih tam ber chu Tripura lama siam danglam a nih tawh avangin a hlauhawm zual tih sawiin MLA chuan, zirlaite chu ram leh hnam hmel tidanglam theitu an nih avangin ruihhlo donaah ṭan la ṭheuh turin a chah a ni.