MLA leh corporator-te'n MHIP Day hmanpui

MLA leh AMC corporator ṭhenkhat chuan nimin khan hmun hrang hrangah MHIP Day lawmna an hmanpui.

Mamit bialtu MLA H Lalzirliana chuan Mamit Chhimveng YMA Hall-a MHIP Day lawmna a hmanpui a, "Chhungkaw enkawl kawnga nute pawimawhna a sang hle. Ina nu berin kan ṭawngkam hman leh miziate hi páwn lama an nunah a lang chhuak ṭhin," tiin, an pawimawhna hre thar a, fanau leh chhungkaw enkawlnaah theihtawp chhuah zel turin nute a fuih. MLA hian MHIP lawmpuina atan Rs 10,000 a pe a ni.

Aizawl North-II bialtu MLA Dr Vanlalthlana chuan a bial chhunga Ramhlun South-ah MHIP Day a hmanpui a, nu ho chu an inrin tawna an intih chak tawn a ngaih thu a sawi a, "Pasal fanaute hmakhua hi hmeichhiate kutah a awm a, chhungkuaah thu ṭha kan sawi tam a ngai hle," a ti.

Aizawl West-III bialtu MLA VL Zaithanzama chuan a bial chhunga Khatla Branch a hmanpui a, "Mizo hmeichhiate hi mipate'n kan tluk ta mang lo. Hmeichhe dinhmun chawikân kan tih ṭhin chu a taka hlawhtling tawhin, kan ramin kan chhuan ber berte an ni tawh zawk," a ti a; hmeichhiate chu dikna leh rinawma chawi nung turin an chak tâwk a, ram leh khawtlang hmasawnna turah mawhphurhna sang tak an neih thu a sawi.

Aizawl South-II bialtu MLA Lalchhuanthanga chuan a bial chhunga ITI Veng Branch-ah a hmanpui a; Mizoramah hmeichhe dinhmun a ṭha viau tawh a, zirna leh eizawnnaah pawh an dinhmun a san tawh thu sawi a, chutihrualin, politics-ah erawh chuan anmahni leh anmahni an la invuak hniam thu a sawi a ni.

Lunglei East bialtu MLA Lawmawma Tochhawng chuan Zobawka MHIP Day hmanpui pahin Zobawk Vengchhak MHIP In sak thar a hawng a; bialtu MLA hmasain Zobawk khawtlang tan thil tam tak a ti tih sawiin, "A sûlhnu kan chhunzawm thei hi a lawmawm a, sorkar kal tawhte sûlhnu chhunzawm loh ṭhin kha ṭhangtharah hian a bo tial tial a, thil ṭha leh rotling turah chuan kan chhunzawm zel hi thil ṭha tak a ni," a ti a; mahni in chhung aṭangin ram leh hnam vei ṭheuh a pawimawh thu a sawi. MHIP Day lawmna hi bialtu councillor Vanlalliana Pachuau pawhin a hmanpui a ni.

AMC corporator leh ZPM Zonu president R Lalawmpuii pawhin a bial chhunga Bethlehem Veng leh Bethlehem Vengthlangah MHIP Day an hmanpui a, sikul hmasa ber chu chhungkua a nih thu leh zirtirtu hmasa ber chu nu an nih thu sawiin, "Páwn lama kan nihna ropui tak takte hian in chhunga nu mawhphurhna pawimawh tak hi tibuai suh se. Khawtlâng leh kohhranah rawng kan bàwl lai hian kan pawimawhna ber leh kan tel loa a buai vekna kan chhungkuaa kan fanaute i hlamchhiah lo ang u," a ti a; mahni in chhung ngaihthaha páwn lama tam lutuk lo turin MHIP member-te a chah.