Myanmar raltlante hriselna dinhmun enfiah

Lunglei DC, Chief Medical Officer leh YMA Sub-Headquarters, Lunglei hnuaia Health & Sanitation Committee-te chuan nimin khan Ṭhaizawl khuaa Myanmar ráltlânte awmna Relief Camp-ah Free Medical Camp an buatsaih a, Lunglei YMA Sub-Hqrs secretary Zothanzuala Hnamte-in a hawng.

Medical Camp-ah hian doctor pangain ráltlân mi 145-te hriselna dinhmun an enfiah a; Lungleia damdawi dawr pariatte'n damdawi eng emaw zat pein, YMA Sub-Hqrs Lunglei-in ambulance an thawh. Damdawi mamawh dangte lei nan Lunglei DC-in senso a tum a, Lunglei South bialtu MLA Dr K Pachhunga'n Rs 5,000 a thawh bawk.

Zothanzuala Hnamte chuan, YMA-in Zo hnahthlakte a hmangaih tih a sawi a, "Amaherawhchu, danin a phal loh ruihhloa inhnamhnawih an awm chuan YMA hruaitute hrilh zel ang che u. Ráltlânte'n harsatna eng pawh in tâwk a nih chuan YMA-in ṭanpui a inpeih reng a ni," a ti.