Sorkar doctor-te an nuar dawn: mass casual leave lâk an tintuah
Mizoram Health Service member, Mizoram Government Doctors' Association (MGDA) chuan an thil phût tihlawhtling tura sorkar kar nan July 10-11 (vawiin leh naktuk) hian hna an thawhna hmunah badge dum an bel dawn a; sorkar aṭanga thu lawmawm an hmuh loh chuan July 13-15, 2023 chhungin a huhoin chawlh an la zui dawn.
MGDA thuchhuak chuan, Mizoram sorkarin a din, MHS Restructuring Committee-in kum khat kal tawha rawtna (recommendation) a siam tawhte chu tun thlenga tihhlawhtlin a la nih loh avangin lungawi lohna an lantir dawn tih an tarlang a; Committee rawtnate chu tihlawhtling thuai turin Mizoram sorkar an ngen.
MHS siamṭhatna tura Committee rawtna leh MGDA phûtte chu hlawh tihsanna tur lam a ni lo tih sawiin MGDA chuan, "Sorkar thâ tichak tura post siam rem (convert) te, thuneihna inkhaidiat tihdikna te, post awm si loa mihring awm sate tana post thar siamte a ni ber. Sorkarin sum a sèn belh a ngai a nih pawhin Committee ngei sawi danin, 'negligible' a ni a, sorkar pachhiatna thlen tur thil a ni lo," an ti.
An thil phût chungchangah hian MGDA chuan July 5, 2023 khan Emergency General Body Meeting an nei a; "Kan service hmasawnna tur hi sorkar hian ngaihtuah duh tak tak loin min tikhawtlai kual vel mai mai niin kan ngai," tiin, Committee rawtnate chu a zavaiin a rang thei ang bera tihlawhtling turin sorkar an phût tlat tih an tarlang.
MGDA tarlan danin, MHS hmasawnna tura ṭul zualte sorkarah an thlen ṭhin a, an beisei ang hmalakna a awm loh avangin February 2022 khan lungawi lohna lantir an tum a, mahse, sorkarin February 17, 2022-ah MHS Restructuring Committee a din avangin an ṭhulh. Committee-ah hian Additional Chief Secretary chu chairman niin, DPAR Secretary chu member secretary a ni a, member-ah Finance Secretary leh Health Secretary an tel. Thla thum chhungin recommendation thehlut tura tih an ni.
Restructuring Committee chuan rawtna, MHS siamṭhatna tura ṭul nia an ngaihte May 2022 khan sorkarah an thehlut tih sawiin MGDA chuan, recommendation-ah an thil phût a kim lo nã a, 'Tun atan chuan a ṭha tho e,' tiin tihhlawhtlin hun an nghak ta niin an tarlang. (Phek 2-ah zawm a ni)
MHS RESTRUCTURING COMMITTEE RAWTTE
▶ MHS tan joint secretary leh under secretary post siam. Kum 2007 vela Cabinet meeting-in a pawm tawh a ni a, MES (engineer)-te chuan secretary post thlengin an nei tawh a, keini'n kan la nei ve lo. Sum sên belh a ngai lo.
▶ Selection grade an neih hmaa special grade duty post ni ṭhinte selection grade post-a siam. Sum sên belh tur a awm lo.
▶ Post thar siam : Sorkarin mamawhna vanga phuahchawp thawktu a dah tawhna, thawktu leh mamawh dang awm sa vek a ni a, sum sên belh tur a awm lo. Post siam a nih chuan specialist/medical officer post ruak a awm dawn a, sorkarin a duh chuan a hnawhkhat ang. Sum a harsa a nih chuan hnawhkhah rih loh mai tur a ni.
▶ Supertime B grade-ah non functional post siam. Sum sen belh a ngai a, a tam tham lo.
▶ Committee-in recommendation a thehluh hnuah hmalakna hmuh theih a awm mai loh avangin MGDA chuan July 2022 khan nawrh an tum. Sorkar hotute'n August 2022 chhungin engkim an peih tur thu an tiam avang leh nuar lo tura an ngen avangin sorkar an nghak a, an nuar lo.
▶ Committee sangin uluk taka an zir hnu chu DPAR-in 'Kan zir chiang mek e' tiin kum khat zet an khâl zui. Lungawi lohna lantir a hrehawm avangin dawhthei takin kan nghak a, May 18, 2023-a Cabinet meeting-a ngaihtuah turin put luh a ni.
▶ Deputy CM-in MGDA Conference-ah, 'Cabinet-ah kan rawn pass mai dawn e,' a tih avangin ngaihṭha takin kan nghak. Cabinet-in financial involvement (sum hman belh) ngai lo chin a pass a, a dang zawng a pass lo a, Cabinet meeting awm leh veleha ngaihtuah turin a dah.
▶ Cabinet-in tuna a pass chinte chu department-in sorkar notification pangngai pawha a chhuah mai theih tur tâwk vel, redesignation, grade nomenclature thlak tih vel a ni. Sa ṭahchhuak pek ang a ni ber.
▶ Cabinet meeting hnua sorkara a buaipuitu ber Secretary kan dàwrnaah, joint secretary leh under secretary post (post siam thar tur ni lo, kan post neih sa convert mai tura rawt, financial implication awm lo) siam chu Cabinet-in a remtih thu a sawi a, mahse, a tak takah a lo ni dêr si lo.
▶ Sorkar hotute kan hmu kual leh char char a, kan lungawi loh thu leh nawrh tak tak hial kan duh thu kan thlen. Deputy CM leh Health Minister ten rei lote chhunga tihfel theih a nih thu sawiin, nghak hrâm tura min tih avangin kan nghak leh. Thla khat leh a chanve kan nghak leh tawh chhungin Finance department pawh a la thleng lo.