Assembly Secretariat-a thawktu lâk tawhna sût a ni

Tun hnaia Legislative Assembly Secretariat-in thawktu a lak tharte chu Mizoram sorkar chuan a sût (cancel) a, panel list pawh a sût tel.

Assembly Secretariat hian translator, assistant leh UDC pakhat ṭheuh leh LDC pariat, an vaiin mi 11 an la thar a; thawktu lak danah hotu ṭhenkhatte chhungkhat laina induhsakna a awm nia hriain MZP leh MSU-in sût turin an phût a, July 7, 2023 khan Assembly House tualah an pungkhawm a ni. July 7 vêk khan Chief Minister nen an inkâwm bawk.

Zirlai pawlte'n ruahmanna an siam dan chuan, an thil phût a hlawhtlin loh chuan vawiin hian punkhawm leh an tum a, chu chuan awmzia a neih loh chuan kawngzawh leh total bandh thlenga huaihawt an tum a ni.

Hetih lai hian Assembly Secretariat chuan July 5, 2023 khan thuchhuah siamin, thawktu an lak chu dan ang taka kalpui a nih thu an lo tarlang tawh a, "Kan sût a, court-ah an kal a nih chuan thiam channa tur kan nei lo. Chuvangin, sût chi-ah kan ngai lo," an ti.

Assembly Secretariat chuan thawktu lak tawhna chu sût chi a nih loh thu tarlang tawh mah se, July 8, Inrinni tlai khan thawktu lak tawhte cancel order a tichhuak a, thuneitu sang aṭanga thu an hmuh anga ṭhiah a nih thu an tarlang.

Thawktu lâkna ṭhiah a nih tâk avangin zirlai pawlte pawhin ruahmanna an lo siam tawhte chu an ṭhulh ve nghal a ni.