Congress leh ZPM an buai nasa hle - MNF

MNF Media & Publicity department hruaitute chuan July 8, Inrinni khan Aizawl Press Club-ah thuthar thehdarhtute an kâwm a; Congress leh ZPM party chu an buai hle nia sawiin, Congress, ZPM leh party danga beidawngte leh neutral-te MNF party-a lut zel turin an sáwm.

MNF general secretary VL Krosshnehzova chuan, inthlanpui hmachhawn turin an inbuatsaih a, MNF-in hma an sawn mek zel nia sawiin, "ZPM, Congress bakah, party tênau dang leh neutral aṭangin ni tin MNF zawm thar kan neih belh zel. Mipuiin kan CM Pu Zoramthanga kaihhruai MNF hi sorkartir leh an tum tih a chiang ta hle," a ti a; kumin May 25 aṭanga July 7 inkar khan Mizoram hmun hrang hrang aṭangin voter 10,757 an lawm lut niin a sawi.

VL Krosshnehzova chuan, MNF-in hma an sâwn mek laiin Congress leh ZPM party-te chu an buai tak zet niin a sawi a; hruaitu ṭha leh rintlak awmna MNF-ah haw khawm zel tura mipui sáwmin, "Kan dik tâwk lohna leh kan tlin tâwk lohna ṭheuhte insiamṭha chung zela Pathian leh kan ram tana rawng­bawlpuiah kan sáwm a che u," a ti.

MNF General Secretary chuan, tun hnaiah Zodintluanga'n Congress treasurer a nihna a bànsan chungchangah, "An President hnenah na takin a bàn chhan lehkhain a pek bakah, zau takin a thehdarh," a ti a; MPCC PAC member KS Thanga pawhin Congress party aṭanga bànna a thehluh thu leh a bànna lehkhaah MPCC President hnena thamna sum pek chungchang ziah a nih thu a sawi.

Mizoram hmun hrang hrangah Congress aṭanga báng thâwm a ring hle nia sawiin Krosshnehzova chuan, "An president Pu Lalsawta’n Congress ni turin duh bik leh thlan bik a nei a, a duh bik leh thlan bik ni lo tan Congress-ah hmun a awm lo. Tuna an hruaitu Congress party-a la awmte pawh MLA ticket chang lo tur chiang sate an ni hlawm a, nakkuma an inthlan huna Pu Lalsawta paih theih a nih beiseia a der maia la Congress hrâm hrâmte an ni," a ti.

VL Krosshnehzova chuan, ZPM hotuteah inrem lohna leh ngaihdan inan lohna a nasa hle nia sawiin, "An hotute'n duhsak hrang ṭheuh an neih avangin an duhsak zawngte hai vûr nan an party danpui pawh an bawhchhe duh. Mahni party chhung pawh rél fel thei lo, mahni dan siam ngei pawh bawhchhe duh hian rorelna fel an kalpui lo ang," a ti a; ZPM-te chu beram vun sina fing taka chinghne khawsa ang vel an nih thu a sawi.

ZPM-in bial viltu an puanah mi ṭha leh thawkrimte aiin mi lâr leh hausa, sum thawh hnem theite bial pek an nia sawiin Krosshnehzova chuan, "Anmahni beiseitute beiseina a thámral. ZPM an keh darh mek a, Lunglei leh Lawngtlai lamah an báng chum chum a, Zoram hmun dangah kângkai zelin an bang chum chum," a ti a; ZPM hotute zingah an zawrh ber ‘Kalphung thar, mipui sorkar’ tih sawifiah thei an awm lo niin a sawi bawk.