Vanglaini logo

Mizoram sorkarin helicopter thlâwk leh Airport aṭanga sum a hmuh dan


GAD (Aviation Wing) tarlan danin, Mizorama helicopter thlâwk (service) aṭangin kum 2021 khan Rs 1,20,53,575 hmuh a ni a, kum 2022-ah Rs 2,84,82,243 leh kuminah March thla thlengin Rs 91,74,300 hmuh a ni.

RTI Act tlawhchhanin GAD (Aviation Wing)-ah hian kum 2013-14 aṭanga kum 2022-23 chhunga kum (financial year) tina Mizorama helicopter thlawk aṭanga Mizoram sorkarin sum a hmuh zat zawh a ni a; mahse, August 2021 leh a hnu lam chin chauha thla khata sum hmuh zat an tarlan bakah, thla tina sum hmuh zat tarlan a ni lo.

RTI Act hmanga zawhna chhannaa a lan danin, GAD Aviation Wing chuan Mizorama helicopter thlâwk aṭangin kum 2021 khan Rs 1,20,53,575 an hmu a, kum 2022 khan Rs 2,84,82,243 leh kuminah January-March chhungin Rs 91,74,300 hmuh a ni. Thla khata an hmuh zat chu a chungah khian tarlan a ni.

GAD Aviation Wing chuan, Lengpui Airport aṭangin thlawh­theihna ṭum man (landing charge) Mizoram sorkarin a lak loh thu leh Airport Authority of India (AAI)-in an lak thu an tarlang a, "Lengpui Airport hi AAI hian kawng tam takah free maintenance an tih avangin thlawhtheihna ṭum man hi AAI hian an la a, Mizoram sorkar kutah a lut lo," an ti.

Hetih lai hian, Lengpui Airport aṭang hian passenger service fee (PSF) aṭangin sum hmuh a ni a, kum 2018 aṭanga 2023 inkara PSF aṭanga Mizoram sorkara sum an chhûn luh chu cheng nuai 900 a nih thu an tarlang.

Lengpui Airport-a venhimna hna thawktu zat zawhna an chhàn danin, CRPF company khat, section khat leh BDDS squad khat rawih an nih thu an tarlang a; Mizoram police post awm zat 77 a nih laiin, police 55 rawih mek a nih thu an tarlang bawk.

Thu dawn danin, Lengpui Airport hi Mizoram sorkar ta a ni a, Airport-a hotu ber chu director niin, director pangngai hun rei tak an awm tawh lo.

Hetih lai hian, GAD Aviation Wing chuan, Airport director mawhphurhna hi GAD Aviation principal consultant Wg.Cdr J Lalhmingliana'n a chelh tih an tarlang a; Director hna chelhtuin a thawh ṭan hun erawh zawh tel ni mah se, an tarlang lo thung.