MPYCC-in City Centre Annexe an tlawh; ṭha taka thawk turin thawktute an ngen

Mizoram Pradesh Youth Congress Committee (MPYCC) hruaitute chuan nimin khan New Market hmuna Aizawl City Centre Annexe building sak mek an tlawh a, ṭha taka hna thawk tawh turin hna thawktu (contractor) Lushai Engineers an ngen.

MPYCC president Laltawnliana chuan, Congress sorkar laiin in sak ṭhatna tur sum dah vek tawh a nih thu sawiin "Kum thum chhunga sak zawh tura tih a ni. Chuti chunga vawiin thlenga sak zawk loh a la ni hi a lungchhiatthlak," a ti.

Hnathawhna hmun hnaia mite'n hnathawh danah duhkhawp loh a tam thu an lo hrilh tih sawiin Laltawnliana chuan, "Building sak zawk tawh anga lang pawh tui pek a ni ngai lo," a ti a, building sakte chu a tlo a rinawm loh thu a sawi.

Aizawl City Centre Annexe chu Mizoram ro tur, mi 2,000 chuang eizawnna tur a nih thu sawiin MPYCC President chuan, "Kan enthla emaw enthla lo emaw, ṭha taka thawk turin thawktute kan ngen. Mirethei zawkte eizawnna tur a ni tih hriaa thawk turin kan duh," a ti.

Congress ṭhalai hruaitute chuan, in sak mek chu Congress MLA-te leh anmahni ngei pawhin an lo tlawh tawh thu an sawi a, "Ṭha taka hna a kal tura ngaih a nih laia thil ṭha lo a lo lang chhuak leh hi pawi kan tiin, lungchhiatthlak kan ti hle," an ti a; tun aṭang chuan hna ṭha taka thawk turin thawktute an ngen a ni.