Manipur ráltlânte chhawmdawlna sum thawh turin sorkarin a ngen

Executive Committee on Internally Displaced Persons (IDPs) from Manipur chuan Manipur ráltlânte chhawmdawlna tur sum thawh turin MLA, AMC corporator, Mizoram sorkar hnathawk, sorkar laipui hnuaia thawk Mizorama awm mekte leh bank leh autonomous district council hnuaia thawkte an ngen.

Sorkar thuchhuah tarlan danin, Manipur raltlante chhawmdawlna tur sum thawh tura ngenna hi Mizoram sorkar sum indaih lohna a nasat avangin Home department-in a chhuah a ni a; MRB, Vaivakawn Branch-a DMR Director account number 97014572199-ah (IFSC code SBINORRMIGB; MICR 796805005) July 25, 2023 thleng thawh theih a nih thu tarlan a ni.

Home department chuan, May 3, 2023 aṭanga tun thlengin Manipur tualchhung buaina avangin ráltlân tam tak Mizoramah an lut a, an ei in tur leh chenna turte sorkarin a ngaihtuah tih a tarlang a, "FCSCA department-in ráltlânte tan buhfai quintal 2,388.50 an pe tawh a, relief camp nei DC-te'n sum leh thâ tam tak an séng tawh. Khawtlangin ṭanpuina an pek bakah, NGO, mimal leh kohhran hrang hrangte pawhin ṭanpuina tur sum, chawhmeh, bungruate an pe reng bawk," an ti.

Home department chuan, "Sum indaih lohna a nasa tawh hle a, chuvang chuan, June 20, 2023-a Executive Committee on IDPs from Manipur ṭhukhawm chuan MLA, corporator, sorkar hnathawk, state PSU, ADC, CPSU, central government, office, bank, Mizorama awmte hnenah an phal ang tâwk ṭanpuina pe tura ngen ni se tiin a rel. Ṭanpuina hi mahni remchan ang ṭheuh thawh turin ngenna siam a ni ta a ni," an ti. Chief minister Zoramthanga'n sorkar laipuiah ráltlân ṭanpuina tur cheng nuai 1,000 a dil mek a, Mizoram sorkarin cheng nuai 500 a ruahman mek thu an tarlang bawk.