CM-in Indoor stadium lungphùm phúm

10th July, 2023

Chief minister Zoramthanga chuan July 8, Inrinni zing khan Zuangtuia indoor stadium sak tur lungphùm a phúm a; infiamna tihhmasawnna atan kum 2018 hnuah a hma lam zawng kum 40 chuang chhunga hman aia tam hman a ni tawh niin a sawi.

CM Zoramthanga chuan, hmasawnna hna chak taka zawh zel a nia sawiin, "Kum 2018 hnuah a hma lam zawng kum 40 chuanga sport atana sum hman belh khawm aia tam sport hmasawnna atan sum hman a nih thu Sports department hotute'n an sawi. Harsatna hrang hrangin ram min tlâkbuakte hi malsawmna tam zawk kan hai chhuahna theihna tura chonaah ka ngai," a ti.

Zuangtuia indoor stadium sak turah badminton court paruk a awm dawn tih sawiin Chief Minister chuan, "Khawtlang leh state angin badminton-ah hma kan sawn phah ngei ka beisei. Hmasawnna ruhrel ṭha din hian a pawimawhna zár zoin hmasawnna dang a thlen belh ṭhin. Helai bial hi in vanneih hle a, sorkar ram hmun ruak a la tam avangin sorkar tan hmasawnna ruhrel lian tak tak dinna atan a thlanawm hle a ni," a ti a; thil dang dangah ruahmanna siam a nih thu a sawi.

Sports minister Robert Romawia Royte pawhin thu sawiin, "Badminton leh sports discipline dangah Mizo ṭhalaite hmasawnna tur rual kan awt ṭhin hle a, kan mamawh chhànna sorkar hotute aṭanga kan hmu ṭhin hi a lawmawm. Sports infrastructure tihhmasawn rah kan hmu zel a ni," a ti.

Lungphùm phùmna inkhawm hi UDPA secretary Lalmalsawma Pachuau-in a kaihruai a; Aizawl mayor Lalrinenga Sailo, Aizawl Smart City Limited chief executive officer CC Lalchhuangkima, Mizoram Badminton Association president Lallianzuala Hnamte leh Zuangtui Local Council chairman Lalchhuanmawia te pawhin thu an sawi.

Indoor stadium hi Aizawl Smart City hnuaiah cheng vbc. 15.05 sénga sak tur a ni a, open tender hmangin December 17, 2021 khan contractor atan F Lalliansanga, Aizawl Venglai thlan a ni. June 3, 2022-ah contract agreement ziah niin, June 17, 2022-ah hna thawh ṭan a ni a, December 10, 2023-ah sak zawh tura ruahman a ni. A sak nan cheng nuai 206 hman a ni tawh a, hna 29.09% thawh zawh tawh a ni.