Serchhip dist-ah chawṭha dawng 7,115 awm

Serchhip District Nutritional Committee chu an chairman Nazuk Kumar, bawrhsap kaihhruaiin July 7, 2023 khan DC meeting hall-ah an ṭhukhawm a, ICDS project hmalakna leh hmachhawpte an sawiho. Kuminah June thla thlengin Serchhip district-ah chawṭha dawng mi 7,115-in an dawng tih an tarlang.

Ṭhutkhawma tarlan danin, kumin June thlenga report-a a lan danin, Supplementary Nutrition Programme hnuaiah nau pai mi 517, naute hnute pe lai nu 383, nausen thla ruk hnuai lam 382, thla ruk leh kum thum inkar naupang 2,643 leh kum 3-6 inkar naupang 3,184-te'n chawṭha an dawng mek a, an vaiin mi 7,115 an ni.

Kum ruk leh a hnuai lamah chaw ṭha mamawh lutuk (severe acute malnutrition) ṭanpuina dawng mek naupang 33 leh chawṭha mamawh belh (moderate degree malnutrition) ṭanpuina dawng 88 an awm. Naupang, a rih dan tur aia zâng 180, naupang zâng lutuk 25, naupang rit lutuk 139, thau uchuak 73, ṭhanṭhú zual/ṭhang thei lo 227 leh ṭhang ṭha tâwk lo 482 an awm mek bawk.

Bawrhsap Nazuk Kumar chuan, thawktute chu chawṭha mamawh lutuk hnuaia enkawl naupang 33-te chu thla thum chhunga moderate level-a awmtir tum turin a ngen a; naupang nu leh pate'n ei tur ṭha leh damdawi leina an nei zo lo a nih pawhin khawtlang hruaitu te, kohhran leh tlawmngai pawlte pawhin ṭanpui an inhuam a rin thu sawiin, anni ho nena ṭangho thiam turin a chah.

Ṭhutkhawmah hian Serchhip district-a anganwadi centre zinga Nutri Garden la nei lote'n an neih theih dan tur te, tui connection la nei loten an neih theih dan tur te, inthiarna hlui tawh lutuk thawm ṭhat dan tur te, gas connection la nei lote ngaihtuahsak dan turte sawiho a ni. Serchhip Saron Veng VC-in anganwadi centre an dilna chu Director hnenah thlen ni se, an ti.

Serchhip district-ah hian anganwadi centre 160 a awm mek a, chu'ng zinga 50 chuan tui connection an la nei lo a ni.