MLA-in Vairengte College thar a hawng

Vairengte College din thar a ni a, July 7, 2023 khan bialtu MLA Lalrinsanga Ralte-in hawngin, kumin July-December chhunga college-a thawkte hlawh tur pawisa a pe nghal.

Serlui MLA Lalrinsanga Ralte chuan, Mizorama college-te chu a tìrah chuan khawtlang hruaitu leh mipuiin an din a nih hlawm thu sawiin, Vairengte College an din thei ta chu khawtlang tan méllung pawimawh tak a nih thu a sawi a, "Kan khawtlangah hmasawnna awm a, hmasawnna thleng tura kan duh chuan a ti thei, hma hruaitu an awm chuan i zui ngam ang u. Risk la ngam lo tan hlawhtlinna a awm lo a, hma hruai ngam an awm chuan i zui mai ang u," a ti.

Lalrinsanga Ralte chuan, Vairengte College leh a bial mipui tan a awm reng tur thu sawiin, "Khawtlang hruaitute leh mipuite ṭanrualna nen Vairengte College hi kan hlawhtlinpui ngei ang," a ti a; MLA-ah thlan tlin leh a nih chuan kum tin Rs 10,00,000 aia tlem lo College enkawlna atan MLA fund aṭangin sum a dah ziah tur thu a sawi bawk.

Vairengte College hi academic session kal mek, 2023-24 atan ṭan nghal a ni a, Saitual College principal pension tawh Dr Lalsiamhnuna chu principal niin, zirtirtu paruk leh LDC pakhat an awm mek. Arts subject paruk - English, Mizo, Education, Economics, History leh Political Science-te awmin, Vairengte High School-ah tlai lamah zirna kalpui rih a ni a; Vairengte VC II-in College hmun tur ram an pe a ni.

MLA Lalrinsanga Ralte hian kumin July-December chhunga Vairengte College-a thawkte hlawh tur a tum vek a, college hawnna inkhawmah hian sum a pe nghal a ni. College bul ṭanna atan computer a pe tawh bawk.