KHAWTHLIR

KTP-in thisen pe

July 8, Inrinni khan KṬP, Chanmari West Branch chuan an kohhran hall-ah thisen pek an huaihawt a, ZMC Blood Bank tan thisen unit 66 an pe a, petute mipa 41 leh hmeichhia 25 an ni. KṬP, Zembawk North Pastor Bial pawhin Synod Hospital tan thisen unit 65 an pe a, petute mipa 56 leh hmeichhia pakua an ni.

MPF seminar

MPF, Aizawl North-III Constituency Forum chuan July 8, Inrinni khan Zarkawt Presbyterian Kohhran Hall-ah an bial chhunga constituency forum hruaitute pualin seminar an buatsaih a, MPF general secretary Rev. Lalramliana Pachuau-in a hmanpui. Chawhmaah Lalthlamuana Ralte-in 'Kan mamawh ram hruaitu ṭha' tih sawiin, zirho a ni a; chawhnuah MPF leh political party-te Thawhhona Thuthlung zirho a ni.

HIV/AIDS zirho

YMA, Ramhlun Venglai Branch chuan July 8, Inrinni khan Ramhlun Indoor Stadium-ah HIV/AIDS Awareness Programme leh kumina HSLC leh HSSLC pass tharte lawmpui hun an hmang a, bialtu MLA Dr Vanlalthlana'n a hmanpui. HIV/AIDS chungchang zirhonaah hian Robert Lalrempuia, MSACS-in HIV/AIDS chungchanga tleirawlte hriat tur pawimawh a zirtir a ni.

Market shed hawng

Minister C Lalrinsanga chuan July 8, Inrinni zing khan Lunglei Rahsi Vengah YMA building cum market shed a hawng. In hi YMA leh sorkar ṭangrualin a ṭul a pianga mipui chhawr theih tura an sak a ni a; Minister chuan, "RKVY sum cheng nuai 15 vel ka pawh chhuah aṭanga sak a ni a, market shed atan mipui leh YMA-ten kan hman ṭangkai theih tura sak a ni," a ti.

Minister-in tlawh

Environment Forest & Climate Change minister TJ Lalnuntluanga chuan July 7, 2023 khan Aizawla hruihnâng hmanga thil siamna hmun, handicraft centre-te a tlawh a; Forest Nursery-ah bul ṭan a nih theih nan kut hnathawktute chu project lian zawka hmalakpui a tum thu a hrilh.