Zokhawsang kawng buaina: Kut hnathawktute JCB nen thawk chhuak; Inremna siampui hnuah an ṭîn darh

Assam Rifles-in Zokhawsanga an hmun paltlang an phal loh avangin Khuangkhau Lui Zau Association leh Zokhawsang Farmers Society member-te chu nimin zing dar 9:30 aṭang khan AR-in Zokhawsang an panna kawng laih chu chah tumin JCB nen an thawk chhuak a, police-in an dan avangin kawng an lai chhe lo. Inremna siampui an nih hnuah hnatlanga thawk chhuakte chu tlai lamah an ṭîn.

Pawl pahnihte hian July 9, Pathianni khan thuchhuah inṭâwm siamin, Zokhawsanga Assam Rifles ram luah piah lam ram chu hectare 1,592 a zau a nih thu an tarlang a, "Revenue pass 700 lai a awm a, chhungkaw 100 aia tlem lote'n eizawnna atan kan hmang. Kan eizawnna kalkawng ber chu tun hnaiah Assam Rifles-te'n ta neihin March, 2023 aṭang khan hman min phalsak lo," an ti.

Mizoram sorkara Home department, Assam Rifles leh Ministry of Home Affairs (MHA) hotute video conferencing hmanga an meeting-ah Mizoram Home department hotute'n Zokhawsangah vantlang kawng siam peih vek a nih tawh thu an sawi tih tarlangin pawl pahnihte chuan, "Hei vang hian AR-in kan eizawnna kalkawng ber chu hman an phal tawh lo a, a hêlna vantlang kawng hmang tawh turin min ti a. Vantlang kawng hi an lài tlang tawh a, mahse, tun dinhmunah chuan kal tlang theih a ni lo," an ti a; vantlang kawng chu siam ṭhat a nih loh chuan hman theih a nih loh thu an tarlang.

Pawl pahnihte chuan, kut hnathawktute ngaihtuah miah loa vantlang kawng Mizoram sorkarin a siam peih tawh anga sorkar laipuia an thlen chu Zokhawsanga huan/lo ram neitu leh kut hnathawktute hmuhsitnaah an ngaih thu an tarlang a; hnatlang an ko ta a ni.

Nimin hnatlangah hian mi eng emaw zat an thawk chhuak a, sorkar thuneitu lam pawh Home secretary H Lalengmawia hoin hnatlanna hmunah an kal. Home Secretary chuan, AR insawnna tur chungchanga hma a lak dan kal khawmte hnenah a sawi a; kut hnathawktute'n harsatna an tawhte an hrilh ve bawk.

Harsatnate sawiho a nih hnuah inremna an siam a, Home department, Zemabawk Local Council leh kut hnathawktu pawl aiawhte'n hming an ziak a ni.

KAWNG CHUNGCHANGA INREMNA

# Zokhawsang leh a chhehvela loneitute'n thu an hriat fiah tâwk loh avanga thu thehdarha Mizoram sorkar leh Home department an puhna chungah thuphá an chawi mai bakah, Assam Rifle-te chungah thinlung takin thuphá an chawi.

# By-pass road siamṭhat a nih hma chuan loneitute'n Assam Rifles battalion head­quarters, Zokhawsang kaltlangin Thawhṭanni, Thawhlehni, Ningani leh Zirtawpniahte lirthei nen zing dar 4 aṭanga tlai dar 6 inkarah an kal tlang thei ang. Nilaini leh Inrinniahte lirtheia kal tlang a rem lo. Ke erawh chuan ni tin kal tlang theih a ni. Hei hi 2nd AR commandant Col. Mukesh Shukla pawmpuinain tihfel nghal a ni.

# Security thil leh ṭul bik thilah Assam Rifles-te leh Home department-te'n an ennawn ṭhin ang.

# By-pass road a rang thei ang bera siam ṭhat a nih theih nan PWD chu hma la nghal tura tih a ni.

# Loneitute lungawi lohna lantir tum chu vawiin (July 10) aṭangin ṭhulh nghal a ni.

KUT HNATHAWKTUTE THIL PHÛT

▶ Vantlang kawng tur sorkarin a siam hi a hman tlak loh avangin kut hnathawktute duh dan leh hman tlak ngeiin siam ni rawh se.

▶ Vantlang kawng kut hnathawktute duh dan anga siam a nih hma loh chuan, tun hma kan pi leh pute hun lai aṭanga kan kalkawng ber (tlang kawng), tuna Assam Rifles-ten an dan tlat hi tiam chin leh phal chin awm loin kut hnathawktute'n zalên takin lirthei leh kea kaltlang theih kan duh.

▶ Vantlang kawng tur sorkarin a siam hi a hman tlak lohzia sorkar leh chanchinbumite'n a hmun ngeiah min enfiahsak se kan duh.

▶ Home department aiawha Mizoram Home Secretary-in Ministry of Home Affairs-ah Assam Rifles-te insawnna tur peihfel vek tawh anga a sawi hi, peihfel a la nih lohzia MHA hnenah thu dik hrilh rawh se.