Private bank-te lakah Governor a lawm lo

Governor Dr Hari Babu Kambhampati chuan, "Mizoramah private bank-te'n sorkar aṭangin sum hlawm lian pui pui deposit an dawng ṭeuh a, sorkar scheme pawimawh tak tak kalpuina atan pawisa an theh chhuak ṭha duh leh si lo hi thil dik lo a ni," a ti.

Governor hian nimin khan Raj Bhavan-ah Khadi & Village Industries Commission (KVIC) hotute a kawm a, KVIC scheme hrang hrang kalpui dan a sawipui a; Mizoramah private bank tam takin sorkar aṭanga sum hlawm lian pui pui an dawn laia sorkar scheme pawimawh tak tak kalpuina atan sum an pe chhuak ṭha duh lo chu thil dik lo a nih thu leh private bank-te'n ṭan la se a duh thu a sawi a ni.

Dr Hari Babu Kambhampati chuan, KVIC hnuaia hmalakna chak zawka kalpui a ṭul thu leh Mizoram Rural Bank, State Bank of India leh Mizoram Cooperative Apex Bank te'n KVIC hnuaia scheme kalpuina atan pawisa hlâwm, margin money an pe chhuak ṭha nia a hriat thu a sawi.

Larsap chuan, "KVIC kaltlanga thingtlang mite tana eizawnna tur siamsak, sumdawnna tênau hmanga bul ṭan duhte ṭanpuina scheme leh a dangte hi mipui tam zawkin an la hre lo a, hemi atan hian media chakna hman thiam a ngai," a ti a; KVIC scheme hnuaia beneficiary-te hnenah an hlawhtlin theihna tur trade thlanpui ṭhin tur leh Mizorama hmanraw tam deuh behchhan industry-te sawimawi ṭhin turin KVIC hotute a chah.

Inkawmnaah hian KVIC State Office-a deputy director Ashish Modak leh KVIC hotu dangte an tel a; an hmalakna leh hmachhawp bakah, chak zawka hmalak dan tur an sawi a ni.