Sorkar doctor-te'n badge dum an bel; Lungawi lohna lantir an titawp rih
Mizoram Government Doctors Association (MGDA) chuan an thil phût tihlawhtling tura sorkar kar nan nimin khan badge dum an bel a; an thil phût chu July 2023 chhunga tihhlawhtlin sorkar hotute'n an tiam avangin vawiina badge dum bel chhunzawm an tum leh July 13-15, 2023 chhung mass casual leave lâk an tum chu an ṭhulh.
Tarlan tawh angin, Mizoram sorkarin a din, MHS (Mizoram Health Service) Restructuring Committee-in kum khat kal tawha rawtna (recommendation) a siam tawhte tihhlawhtlin phûtin MGDA chuan July 10-11 chhung badge dum bel a, July 13-15 chhung mass casual leave lak an tum a; nimin khan hna an thawhnaah badge dum an bel ṭan a ni.
Lungawi lohna lantir an tum tâk avangin deputy chief minister Tawnluia leh Health minister Dr R Lalthangliana te chuan nimin zing dar 7 khan MGDA hruaitute an kâwm a; Health & Family Welfare Board vice chairman MLA Dr ZR Thiamsanga, Finance Secretary, Health Secretary leh sorkar official dangte an tel. MGDA hruaitute chu nimin chawhnu khan chief minister Zoramthanga'n a kâwm leh bawk.
Sorkar hotute chuan MHS Restructuring Committee recomendation chu tun July thlaa Cabinet meeting-ah ngaihtuah ngei a nih tur thu leh a theih anga tihhlawhtlin ngei a lo tiam a; lungawi lohna lantir chhunzawm lo turin an lo ngen tih MDGA thuchhuah chuan a tarlang.
MHS Restructuring Committee-in rawtna a siam tawhte chu July 2023 chhung ngeia Cabinet meeting-a ngaihtuah a, theihtawp chhuaha tihhlawhtlin an tum thu CM, Deputy CM, Health Minister leh sorkar official-te'n an sawi vek chu rintlakah an ngai tih tarlangin MGDA chuan, "Black badge kan bel mek leh July 13 aṭanga mass casual leave lak kan tum chu ṭhulh lailawk rih ni se kan ti a, sorkar thu ngaichâng reng chungin hmalak dan tur kan ngaihtuah zel dawn a ni," an ti.
MGDA chuan, MHS siamṭhatna tura Committee rawtna leh MGDA phûtte chu hlawh tihsanna tur lam a ni lo tih tarlangin, "Sorkar thâ tichak tura post siam rem (convert) te, thuneihna inkhaidiat tihdikna te, post awm si loa mihring awm sate tana post thar siamte a ni ber. Sorkarin sum a sên belh a ngai a nih pawhin Committee ngei sawi danin, 'negligible' a ni a, sorkar pachhiatna thlen tur thil a ni lo," tiin an lo tarlang tawh a ni.