Manipur buaina vanga punkhawmah Mizo mipui tel turin ZoRO-in an sáwm

Zo Reunification Organisation (ZoRO) hruaitute chuan nimin khan Aizawl Press Club-ah thuthar thehdarhtute an kâwm a; July 12, 2023 (Nilaini) hian Vanapa Hall kawtah Manipur buainaa Zo fate tawrhpuina punkhawm an huaihawt dawn a, Prime Minister, Manipur Chief Minister leh David Thiek lu tantute lim an hâl dawn tih an sawi.

ZoRO president R Sangkawia chuan, Manipur tualchhung buainain ni 68 a awh tawh tih sawiin, "A huatthlala lai ber chu Meitei mipui leh hel pawl Arambai Tangol leh Meitei Lapun ṭangrualte an chief minister Biren Singh leh a police commando rualin an pui hi a ni," a ti.

R Sangkawia chuan, "An Chief Minister leh Manipur police commando-te'n theihtawpin an pui a, Zo fa tam tak an that leh in leh lo tam tak an hâl chhia te, biak-in hmusit taka an hâl chhia te, mi tam tak Meitei lakah an hliam te, nunrâwng taka an chete hi lungchhiatthlak kan ti hle," a ti a; Meitei mipuiin Manipur-a Mizote nuai chimih vek tumin tharum an thawh tih a sawi.

ZoRO President chuan, Meitei hoin human rights an bawhchhiat nasatzia leh UN Declaration on the Rights of Indigenous People an bawhchhiat thu May 13, 3023 khan UN Secretary General hnenah ziaka an thlen thu leh India President hnenah pawh memorandum an thawn tawh thu a sawi a; India sorkar aṭangin chanchin lawmawm a awm theih lo avangin thil nihphung a dik thei ang ber hriatna turin ZoRO-in Fact Finding Committee on Manipur Disturbance an din tih a sawi bawk.

Fact Finding Committee on Minipur Disturbance-in report a neih chinah, July 8, 2023 thleng khan Manipur buaina vangin mi 124 chuang an thi a, hliam damdawi-ina awm mi 377, chin hriat loha bo mi 60 chuang an awm. Khua 290, 7,247, biak-in leh quarters 357 hâl a ni tawh a; ráltlân mi 41,425 leh ITLF Relief Camp, Lamka-ah mi 110 an awm a ni.

R Sangkawia chuan, Manipur buaina chungchangah sorkar laipui a ngawi reng leh buaina tireh tura hma a la lo chu an ngaithiam lo hle tih sawiin, "Buaina chingfel tur ni àwm taka dah para militaray force leh sipai eng emaw zatte chu Manipur CM thuhnuaiah an dah a, Zo fate tan a him lo," a ti.

ZORO President chuan, India sorkar auh eih nan leh Manipur-a buaina hmeh mih thuai an phûtna lantir nan July 12, Nilaini chhun dar 12-ah Vanapa Hall kawtah 'Manipura Zo fate tawrhpuina punkhawm' an huaihawt dawn tih sawiin, tel vek turin Mizo mipui a sáwm a ni.