Zirna-ina ruihhlo donaa hma latu Nodal officer 446 ruat tawh

Social Welfare & Tribal Affairs minister Lalrinawma hoin nimin khan Aizawl DC conference hall-ah Aizawl District Task Force on Ruihhlo Do hmalaknate thlirho a ni a; zirna-in hrang hrangah ruihhlo donaa hma latu tur nodal officer 446 ruat a nih tawh thu tarlan a ni.

Ṭhutkhawmah hian Excise & Narcotics, School Education, IPR, Health & Family Welfare, Social Welfare & Tribal Affairs department hotu te, Mizoram Journalist Association, Central YMA leh MZP aiawhte an tel a; ruihhlo donaa hmalak dan tur leh Aizawl district-a Ruihhlo Do Ni (August 1) hman dan tur an sawiho.

SWTA Minister chuan, District Task Force-in ruihhlo donaa ṭha taka hma a la chu lawmawm a tih thu a sawi a, "Ruihhlo donaah hian mi tin kan ṭan rual a pawimawh. Ruihhlo do hi kan zavaia mawhphurhna a ni tih hre thar a, ṭan la sauh sauh a, ṭhangtharte fuihtu ni ang che u," a ti.

Ṭhutkhawma tarlan danin, Aizawl district-a khua/veng tinah Village/Local Task Force on Ruihho Do din vek turin hriattirna leh ngenna siam a ni tawh a, veng/khua 38-ah din a ni tawh. Zirna-in hrang hrangah ruihhlo donaa hma latu tur nodal officer 446 ruat a ni tawh a, chu'ngah chuan ruihhlo ṭhat lohzia inzirtirna buatsaih tura ruahman a ni.