New Market building sak dan dem

Mizoram First pawl chuan thuchhuah siamin, Aizawl New Market sak ṭhat danah an ngaih a ṭhat loh thu leh a enkawltu department hotute'n an vil ṭha lo nia a lan avangin an dem thu an tarlang.

Mizoram First chuan, Lushai Engineers-in an sak mek New Market building chu July 8, 2023 khan plinth/foundation buaipui mek laiin an tlawh a, an tlawh lai hian foundation plinth-beam an lo chhûng mek tih an tarlang a, "An chhûn lai chu tui tam tâwkin a chîm mek a, tui tlingah chuan cement chawh sa an chhûng mawlh mawlh a ni," an ti.

New Market building foundation turah tui tling chhunga cement chawh sa an chhûng lai video a darh hnuah foundation beam chhûn tawh chu vuak chhiat leh a nia sawi a nih thu tarlangin Mizoram First chuan, "Mizoram First team, a hmuna entute chuan a chung lam leh eng emaw chin chauh vuak chhiat a ni tih an hmu," an ti a; cement hman chu a chár hma chi (quick setting) a nih loh avangin New Market building sak tur chu a derthâwng hle tura an ngaih thu an tarlang.

Mizoram First chuan, New Market sak mek chu ram ro hlu tur a nih avangin contractor leh thawktute'n an sak dan a ṭhat leh ṭhat loh enfiah turin sorkar thuneitute an phût tih an sawi a; October 2019-a hna thawh ṭan, October 2021-a zawh tura ruahman a nih laiin tun thlengin zawh a la ni lo tih sawiin, "Heti taka hna tihkhawtlai a ni hi a enkawltu department-te pawhin an vil ṭha lo niin kan ngai a, kan dem a ni," an ti.