Current man hlum Manipur-ah thawn

Manipur buaina avanga sahimna zawnga Mizorama rawn tlan lut zinga mi Lammuanthang (39), Lamka Kanan veng, Churachandpur district chu nimin zing dar 6 vel khan kawlphethain a man avangin a thi a, nimin vek khan a ruang Manipur-ah thawn a ni.

Thu dawn danin, Lammuanthang hi kumin June thla tìr lama Mizorama rawn lut niin, a tir lamah chuan NE Khawdungseiah a awm phawt a, thla khat vel hnuah sahimna zawnga rawn lut ve tho Sihphir Kawnvenga mi in luaha khawsa Chingthianmuang te bêlin a khawsa a ni. Nimin zing khan Sihphir Kawnvenga in luah tur an hmuh thar chu a chung rangva pawp thawm ṭha turin in chungah a lawn a, electric current hrui lianin a man ta nia hriat a ni.

Lammuanthang tan hian YMA, Sihphir Branch-in kuang an siam a, Central YMA Hall-ah thlahna hun hman a nih hnuah nimin chhun dar 11:30 vel khan CYMA morque van-in Manipur lam panpui a ni. YMA morque van hian Tuivai lei thleng a phur a, Tuivai lei aṭangin YMA, Manipur Group-in an lo la a ni.