Mamitah sangha khawi inzirtir

Mamit District Fisheries Development Officer pisa chuan nimin khan DC conference hall-ah sangha kháwi-tute tan 'National Fish Farmers Day cum Capacity Building of Fish Farmer Training' an buatsaih a, bawrhsap VL Remliana'n a hmanpui.

Training hi Rashtriya Krishi Vikas Yojana - Remunerative Approaches for Agriculture and Allied Sectors Rejuvenation (RKVY-RAFTAAR) 2020-21 hnuaia buatsaih a ni a; Ramtinchawma, Nàlzawl hnenah Best Fish Farmer Award hlan a ni.

Mamit district fisheries development officer Lalremsangpuii'n 'Riverine Conservation & Fisheries Rules (2019) & Act (2022)' chungchang a sawifiah a; FD Lalsiamliani'n 'Pond construction & management' leh FD Jimmy Lalbiaktluanga'n 'Common carp breeding' tih thupui an sawi bawk.

Mamit DC chuan, Mizoram leilung mila chìn tur leh thar turah kut hnathawktute'n ngaihtuahna séng ṭhin se a duh thu sawiin, "Kan ramah tui khawlna atana ṭha ber pawl chu tuikhuah a ni a, sanghaa kan intodelh mai bakah, water conservation lamah nasa takin kan ṭhan phah dawn a ni," a ti.