ZPM sorkar hunah thawhrimnain awmzia a nei dawn - MLA Sawivunga

ZPM party chuan nimin khan an pisaah chhung inkhawm an nei a, MLA C Lalsawivunga'n thu sawiin, ZPM an sorkar chuan kut hnathawktute thawhrimna leh thawh hahnain awmzia a nei dawn niin a sawi.

Aizawl South-I bialtu MLA C Lalsawivunga chuan, party dang neih ve loh leader an nei tih sawiin, "A kaihhruaina hnuaiah ZPM-in sorkarna a chang a nih chuan kut hnathawktute thawhrimna leh thawh hahnate'n awmzia a nei tawh ang a, beidawnga awm mek te, beiseina nei ngam tawh lote'n beiseina thar kan neih theihna turin kalphung thar, mipui sorkar siamtu zingah kan haw khawm a ngai a ni," a ti.

Mizoram state a nih hnu kum 36 chuang chhunga ram kaihhruai tawhtute'n Mizoram an thlenpui chin mipuiin an hriat thu sawiin Lalsawivunga chuan, "Kalphung thar, mipui sorkar din tura kan inbuatsaihna hi mipuiin a taka chantir an tum mek. Social media-a sawiselna leh chirhthehna kan tawhte hian min tihnual lo," a ti a; sorkar dàwr tur pawha duhthusam chief ministerial candidate an neih thu a sawi.

C Lalsawivunga chuan, chief Minister ṭha lo hnuaiah chuan mithiam tak takte pawh engmah ti thei loin an ṭhu ṭhuap mek nia sawiin, "Retheih huama kan ram tana beitu ZPM leader Pu Lalduhoma hruaina hnuaiah rorelna ṭha tun dinin a awm ngei ang tih ka ring a, Zoram mipui zawng zawng pawh rorelna ṭha tungdingtu ni turin ka sáwm a ni," a ti.