KHAWTHLIR

Tawngtai rual

Mizoram Kohhran Hruaitute Committee ruahman angin, Mizorama kohhran hrang hrangte chu July 9, Pathianni zan khan inkhawmah Manipur tualchhung buaina leh Uniform Civil Code (UCC) chungchangah an ṭawngṭai rual. Ṭawngṭai rualnaa tel turin CYMA hruaitute chuan transit camp, CYMA Hall-a ráltlân awm mek mi 30 chu Mission Veng biak-inah an inkhawmpui a; Manipur-ah buaina a tàwp a, remna leh muanna a awm theih nan te, India ramah UCC hman a nih loh nante kohhran mipui an ṭawngṭai a ni.

MYC Super IAS screening exam

Mizoram Youth Commission chuan nimin khan MYC Centre paliah Super IAS Programme hnuaia full sponsor hmu tur thlanna (screening exam) an buatsaih a, mi 188 an inlan. July 13, 2023-ah exam result tihchhuah tum a ni a, inziak tlingte tan July 17, 2023-ah personal interview buatsaih a ni ang.

Heroin man

Excise & Narcotics department mite chuan July 9, Pathianni tlai dar 4:30 khan Thenzawl UPC Vengah heroin gram 357.440 (hawng 30) leh a neitua puh mi pahnih - Ramhmunmawia (21) s/o Ropuia, Thenzawl Bazar Veng leh Lalhmingthanga (28) s/o Malsawmkawlnia, Thenzawl UPC Veng nia inchhálte an man.

ASF lênna puang

Champhaia AH&Vety officer Dr B Lallawmsanga chuan nimin khan Champhai Vengthlang chu vawk pûl hri, African Swine Fever lênna hmun, infected area-ah a puang. Champhai Vengthlang aṭangin vawk lak luh, lak chhuah, talh, a sa zawrh khap a ni a; vawk thite chu chinai nen leiah thuk taka phûm tur a ni.

Transit camp-ah mi 512 lut tawh

Manipur tualchhung buaina avanga sahimna zawnga Mizorama lutte awm lailawkna atan Central YMA-in an hall-a transit camp a siamah mi 512 an tlu lut tawh. Transit camp-a lutte chu a hnuah Aizawla YMA branch-te hnenah an remchan anga an lo buaipui turin sem darh leh ṭhin a ni a, YMA branch 12 hnenah sem darh a ni tawh.