Police post-ah kuhva chíngtute chhun zan zawmin an duty dawn: Hachhek MLA-in CM-ah lehkha a thehlut

Hachhek Bial Kuhva Chíngtu Pawl (HBKCP) chuan Zamuanga police checkpost-a duty-te thâ tichak turin vawiin zing dar 9 aṭangin chhun zan zawmin an duty ve tawh dawn tih an puang. Hetih lai hian, Hachhek bialtu MLA Lalrindika Ralte chuan dan loa kuhva tawlh rûk titawp tura ngenna nimin khan Chief Minister hnenah a thehlut.

July 10, 2023-a Kawrthah North VC House-a HBKCP Executive Committee ṭhukhawm chuan, kuhva an tharte hralhnaah harsatna an neih loh nan leh ram dang aṭanga dan loa kuhva lak luh tawlh rukte an dan chah theih nan Zamuang police checkpost behchhanin July 12, 2023 zing dar 9 aṭangin chhum lo chat loa duty ve an rêl a ni.

HBKCP aṭanga duy-te chu Hachhek bial chhunga khaw hrang hrang aṭangin an inchhâwk dawn a, eng lai pawhin, chhun leh zanah pawh an duty ve tawh dawn a ni. Khawi aṭang mahin Hachhek bial chhungah dan loa kuhva tawlh lut lo turin kuhva tawlh ruka inhnamhnawih ṭhin, lirthei neitu leh khalhtu zawng zawng an chah.

Police checkpost-ah duty beihpui an thlâk dawn avanga mimal leh pawl anga sum leh pai thawhtute zawng zawng chungah HBKCP chuan lawmthu a sawi a ni.

Zamuanga police checkpost hi HBKCP-in sorkar thuneitute an ngen anga siam a ni a, duty turin Hachhek biala police station leh out post bakah, IR police leh MAP-a awmte an fawm khawm ṭhin. HBKCP chuan, Hachhek biala police leh armed force awmte chu station tinah awm tur zat aia tlem an awm vek tih an tarlang.

Hachhek bialtu MLA Lalrindika Ralte chuan, dan loa Myanmar aṭanga kuhva tawlh rûk titawp tura ngenna nimin khan ziakin chief minister Zoramthanga hnenah a hlan a; "Dan bawhchhetute hrem a, dan ṭha taka zâwmtu mipui humhim hi sorkar mawhphurhna a nih avangin, kuhva smuggling titawp tura awmze neia hma la nghal turin kut hnathawktute aiawhin ka ngen a che," a ti.

Lalrindika Ralte chuan, "I kaihhruai sorkarin kuhva smuggling titawp tura tih tak zeta hma a lak duh loh avanga kuhva smuggling a la kal reng hi hriatthiam a har ka ti tak zet. Mizoram sorkara mi pawimawhte zingah kuhva smuggler-te thawhpui tlattute an awm ni ngeia ringtu tam tak an awm pawh hi a mak lo. I kaihhruai sorkarin hma a lak ṭhat duh loh avanga kuhva chíngtute’n an ei leh bàr zawnna humhim tura anmahni kutkawiha hma an lak a ngai ṭhinte hi a lungchhiatthlak tak zet a ni," tiin a ziak.

Hachhek bialtu MLA chuan a lehkhaah, ram dang kuhva tawlh rukin Mizorama kut hnathawktute tan harsatna nasa takin a thlen tih chiang takin a (CM) hriat thu te, kuhva tawlh ruk chungchang chu titawp turin Prime Minister hnenah lehkha a ziah tawh thu te, Ministry of Home Affairs pawhin kuhva smuggling titawp tura hriattirna Mizoram Chief Secretary-ah an pek tawh thute a tarlang.

Lalrindika Ralte chuan, dan bawhchhetu, kuhva tawlh rutute vanga kut hnathawktute’n kum tam tak thi leh thau pawlha an thawhrim rah an seng tur nasa taka a heu chu vanduaithlak a tih thu a tarlang a; "Ka bial Hachhek constituency-a mi taima, kut hnathawktu chhuanawm tak takte hi a tuar nasa berte an ni. An chaw thlêng ben buaksaktu, an harsatna hriatpui duh lo leh smuggler-te thlavâng hauh tlattu chu i sorkar kaihhruai mek hi niin kei pawhin ka hmu hial tawh a ni," a ti bawk.

HBKCP hruaitute July 10 zana ṭhukhawm chuan, dan loha kuhva tawlh rûk vanga kum 2022 chhunga Hachhek bial chhunga kuhva chíngtute'n sum an hmuh tur an hmuh phak loh zat an zir chiang. Kuhva hralhna aṭangin kum 2021-ah cheng nuai 3,235 chuang an hmu a, kum 2022-ah cheng nuai 5,000 chuang hmuh an inbeisei laiin, nuai 2,000 chuang an hlohah an ngai a ni.