Kolasib KVK ram chhuh tum an awm?; KVK ramah perh eng emaw zat an khéng

MJA, Kolasib District hruaitute chuan Kolasib khaw chhunga sorkar ram, mimal hnena ṭheh tuma hmalak chungchang nimin khan Kolasib bawrhsap John LT Sanga a pisaah an sawipui a; Krishi Vigyan Kendra (KVK), Kolasib ram chu mi ṭhenkhatin neih tumin perh (peg) eng emaw zat an khen thu an hrilh.

Kolasib MJA chuan, KVK rama perh khéngtute chu hriat chian ni lo mah se, Kolasib Vengthar MNF group leh unit-te nia sawi a nih thu an tarlang. KVK ram chu Kolasib bialtu MLA K Lalrinliana, minister-in vawiinah a tlawh dawn a, tour programme-ah chuan 'In hmun nei lote'n in hmun an beiseina hmun KVK ram ka tlawh ang' tia tarlan a ni.

MJA, Kolasib hruaitute chuan, tun hnaiah Kolasib KVK ram chu mi ṭhenkhatin neihsak tumin perh an khen thu an sawi bakah, Kolasib khawpui chhunga sorkar department ṭhenkhat ramte pawh mimal hnena ṭheh tumna a awm nia an hriat thu leh, dan tlawhchhan awm loa chêtna thleng hriat tur awm leh ṭhin chu ṭha lo an tih thu an sawi a ni.

Bawrhsap chuan, sorkar department zingah Kolasib-a ram nei lo eng emaw zat an awm thu sawiin, ram nei lo department-te tan office hmun an neih theih nan hma a lak thu a lo hrilh.

Sorkar department ram reng reng a neitu department phalna lo chuan mimalin a luahsak emaw, chhuh luih emaw chu dan bawhchhiatna a nih thu leh, Bilkhawthlirah pawh chhungkaw pahnihin Soil department ramah in an sak avangin in an sak lai titawp tura a hriattir thu Bawrhsap chuan a sawi.

Kolasib DC chuan, tun hnaia KVK ram chhuh tumna awm nia sawi chu a hmunah SDC tírin a enfiahtír tawh thu leh, Government Protection Act tlawhchhanin sorkar department ramte humhalh a nih thu a sawi a, "Department-in ram an luah sèn loh vangin neihsak ngawt theih a ni lo a, dan zâwm chunga thil kalpui a ngai," a ti.

KVK, Kolasib hi kum 1979-a din a ni a, a din tirh lamah chuan a awmna chu ramhnuai a ni. Kolasib-a chanchinbumite chuan, KVK chu loneitute tan a ṭangkai thu leh demonstration tihna atan ram zau tak an mamawh avangin KVK ram chu venhim a ṭul thu an tarlang.

KOLASIB MJA TARLAN DANGTE

▶ KVK, Kolasib ram hi in hmun atan mi ṭhenkhatin ṭheh tumin tun hnai khan perh an khéng. KVK hotute'n perh khéngtute chu tute nge an nih an hre lo.

▶ Hma latute hriat ni lo mah se, Kolasib Vengthar MNF group leh MNF unit-te niin an sawi.

▶ Kolasib bialtu MLA K Lalrinliana, minister-in vawiin Nilaini hian KVK, Kolasib ram a tlawh dawn a, tour programme-ah 'In hmun nei lote'n in hmun an beiseina hmun KVK ram ka tlawh ang' tia tarlan a ni.

▶ Ram hi mi engzat tan nge ṭheh tum a nih hriat a ni lo a, an perh khenna aṭang chuan mi 50 vel an tlin rin a ni.