Union Minister-in Champhai a tlawh; CSS-te a nihna anga kalpui turin a chah

Sorkar laipuia Agriculture & Farmers' Welfare minister of state Shobha Karandlaje chuan nimin khan zan khat riak turin Champhai a tlawh a; sorkar hotute chu an department kaltlanga sorkar laipui scheme awmte zir chiang a, hre bel tur leh a nihna ang tur taka kalpui a nih theih nan ṭan la turin a chah.

Shobha Karandlaje hian Circuit House-ah Champhaia sorkar hotute leh khawtlang hruai­tute a kâwm a; sorkar laipui scheme-te'n a tinzâwn leh dawng thei tura ngaihte hnen a thlen kim theih nan ṭan lak a ṭul thu sawiin, "Ram pum hmasawn turin India ram hmun hrang hrangah hma­sawnna a thlen a ngai a, sorkar hotute'n in department kaltlanga sorkar laipui scheme awmte zir chiangin hre bel u la, a nihna ang tur taka kalpui a nih theih nan ṭan la ang che u," a ti.

Hmarchhak state-te'n sorkar laipui scheme hrang hrangah 90% subsidy an dawng chu vanneihthlak a tih thu sawiin Minister chuan, "Ṭha taka scheme hlen chhuah a ṭul. Loneitute hi India ram ei leh bâra châwmtu an nih avangin sorkar laipuiin a ngai pawimawh hle," a ti a; centrally sponsored scheme (CSS) khawih department hotute chu harsatna awmte leh bawhzui ṭulte ziaka a hnena thlen tura chahin, sorkar laipuiah bawhzui a tum thu a sawi.

Union Minister hian Champhai leilet záwl tlawhin, farmer interest group member-te a kâwm a; hma an lak dan leh harsatnate a sawipui bakah, loneitute tana sorkar laipuiin ham­ṭhatna a duante an chhawr ṭang­kai dan a zawt. Line depart­ment hotute chu leilet neitute harsatna hre chunga detail project report siama sorkar laipuia thehlut turin a chah nghal.

Shobha Karandlaje hian Champhai Tlangsamah Pradhan Mantri Matsya Sampada Yojana kaltlanga cheng nuai 15 sénga din sangha no thar chhuahna Freshwater Finfish Hatchery Unit leh Champhai Grape Growers Society-te enkawl Champhai Winery a tlawh. Sorkar laipuiin food processing industry a ngaih pawimawh thu sawiin, Champhai leh Hnahlan grape winery hotute thil thlente a ṭul anga lo ngaihven zui a tum thu a sawi.

Union Minister hi district bawrhsap James Lalrinchhana, SP Lalrinpuia Varte leh sorkar official dangte'n an lo dawngsawng a; Non Lapsable Central Pool of Resources sum vbc 19.88 sênga PHE department-in Keilungliah tuikhuah an siam a tlawh bawk.