Nightingale Award dawngtu HFW Minister-in a chawimawi

Health & Family Welfare minister Dr R Lalthangliana chuan nimin khan a pisaah kumina India rama nurse chawimawina sang ber, National Florence Nightingale Award dawngtu C Zopari hnenah chawimawina a hlan.

HFW Minister chuan, Mizo nurse-te chu an fel bakah an thiam bika a hriat ṭhin thu sawiin, "India ram leh ram hrang hrangah Mizo nurse an awm ve tawh hi a lawmawm a, an taimak leh damlo an duat thiam avangin an kalna a piangah an hmingṭha a, fak an hlawh. Mizo nurse ram páwna awmte an tuarchhel em em tawh a, ram páwnah nurse mamawhna a san avangin Mizorama nurse ṭha tak takte'n tuipuiral thlenga thawk turin ṭan an lak a ṭul," a ti.

Nurse-te chu mi dangte tana inpe leh malsawmna ni chhunzawm zel tura chahin Dr R Lalthangliana chuan, "Pi C Zopari chawimawina dawn hian mi dangte cho phûr se ka duh," a ti a; nursing chu Mizoramin resource a neih ṭhat ber zinga mi a nih avangin Mizo ram leh hnam hmingṭhatna turin nurse-te an pawimawh thu a sawi.

C Zopari chuan, "Tu pawh hian kan hna ṭheuh hi tui taka kan thawh chuan kan rin phâk bâk hian a rah ṭha kan seng ṭhin," a ti a; Health & Family Welfare Board vice chairman Dr ZR Thiamsanga, MLA-in thu an sawi bawk.

National Florence Nightingale Award hi kum 1973-ah sem ṭan a ni a, Mizorama nurse 15-in an dawng tawh. Ward superintendent (rtd) C Zopari, Dinthar Veng hian June 22, 2023 khan Rastrapati Bhavan, New Delhi-ah President Droupadi Murmu hnen aṭangin a dawng a ni.