Minister-in Lunglei DIET in thar a hawng

District Institute for Education and Training (DIET), Lunglei academic building sak thar chu nimin khan School Education minister Lalchhandama Ralte-in a hawng a, "Kan rama zirna kan siamṭhat dawn chuan zirtirtute training-na hmunpui DIET-ah bul kan ṭan a ṭul," a ti.

Lunglei DIET building thar hi Samagra Shiksha-in kum 2020-21 chhunga sum a ruahman nuai 327.432 hmanga sak a ni a, contractor chu Allied Concern a ni. February 23, 2022-ah hna thawh ṭan niin, June 22, 2023-ah sak zawh a ni a; classroom pasarih, faculty room pahnih, multipurpose hall bakah thil dang hrang hrang atana hman tur pindan eng emaw zat a awm.

School Education Minister chuan, Lunglei DIET building tharin hna an thawhna leh an zirnaah nghawng ṭha a neih ngei a beisei thu a sawi a, "Mizorama DIET pariat awm mekte bakah, Hnahthial leh Khawzawlah pawh ruahman tum mek a ni," a ti a; Lunglei DIET thawk leh zirlaite chu ṭhahnemngai taka thawk tur leh zir tur te, ram leh hnam hmasawnna lam hmathlir nei turtein a chah.

Mizoramah zirna hmasawnna turin Education department-in nasa takin ṭan a la nia sawiin Lalchhandama chuan, "National Education Policy, 2020-in a duan angin sikula zirna a bulṭhut aṭanga siamṭhat hna tawh mek a ni a, SCERT hmalaknain elementary education tihhmasawnna turin Early Childhood Care and Education-ah theihtawp chhuah a ni. Ṭhangtharte'n Mizo hnam ziaráng leh history-te an hmelhriat zawk theih nan sikul zirlaibute siam rem mek zel a ni," a ti.

Education Minister chuan, government adhoc aided school-te dinhmun dang zawka hlàn kai chungchangah department-in hma a la mek niin a sawi bawk.

Lunglei DIET hawnna inkhawm hi SCERT director Laldawngliani Chawngthu-in a kaihruai a, Lunglei High Powered Committee vice chairman Lawmawma Tochhawng, MLA pawhin thu a sawi a ni.