Sawta hruai sorkar a pian ngei ṭul ti

Nimina Lal Thanhawla Auditorium-a buatsaih Aizawl City Congress Operation E-Roll Training & Briefing chuan resolution siamin, Mizoramah sorkar ṭha, khua leh tui zawng zawng innghahna tlâk a pian ngei theih nan Lalsawta kaihhruai sorkar a pian ngei ṭul an tih thu an tarlang.

Training hi Aizawl District Congress Committee (ADCC) buatsaih a ni a; "Kan ramah sorkar ṭha, khua leh tui zawng zawngte innghahna tlak a pian ngei theih nan Pu Lalsawta kaihhruai sorkar pian ngei ṭul kan ti a, a kaihhruaina hi kan ring tâwk," an ti. Aizawl khawpui huam chhunga Assembly constituency zawng zawngah Congress an chak ngei theih nan hma an la dawn tih tarlangin, Congress vote turin mipui an sáwm.

Inkhawmah hian Mizoram Pradesh Congress Committee (MPCC) chuan president Lalsawta'n thu sawiin, India ram mipui, mi hnuaihnung zawk leh khawsa thei zawkte him taka an awm tlân theih a pawimawh tih a sawi a, "Chutiang tur chuan Congress party hi India ramah a tho leh mek a, Mizoramah pawh kan tho chhuak mek a ni," a ti.

Lalsawta chuan, "Kum 2023 MLA General Election-ah Congress party a sorkar loh chuan BJP thawhpuitute'n sorkar an siam leh a ngai dawn a, ram leh sakhua tan a him lo a, a pawi em em a ni," a ti a; BJP thawhpui ngai lo tur Congress party-in sorkar an siam a ngai niin a sawi.

Eirukna do turin sorkar ṭha siam ngei an tum nia sawiin Lalsawta chuan, "Eirukna do a har lohzia kan hre chiang em em a, kan ti thei a ni. Ṭang puihna hmangin ram ṭha kan siam ang a, ṭang taka hnathawkte kan pui ang a, ṭan ngaihna hre lo khawpa harsate kan pui ang a, kan ramah hian mi rethei leh hausa inkar tizím a, ram ṭha siam turin theihtawp kan chhuah dawn a ni," a ti.

MPCC vice president Lal Thanzara pawhin thu sawiin, "Sakhaw zalenna duhtu Congress party hi BJP nautê a ni ve dawn lo a, a ni thiang lo. Kristianna tidal thei, tihdal tum hi Central-a an lal reng chuan kan ram pawh hi a tluchhe vat dawn," a ti a; Mizoramah MNF emaw, ZPM emaw an sorkar chuan BJP nautê an nei reng dawn niin a sawi.