Zo hnahthlak thlavâng hauh duh loah MPCC Treasurer-in Mizoram CM a puh

Congress party chuan nimin khan Serchhip Bazar kâwnah vantlang inkhawm an buatsaih a; Mizoram Pradesh Congress Committee treasurer Dr Lalmalsawma Nghaka chuan, Mizoram ṭhenawm state-ah BJP sorkarna hnuaiah Zo hnahthlakte'n harsatna an tawh mek thu sawiin, an thlavang hauh duh loah Mizoram Chief Minister a puh.

Dr Lalmalsawma Nghaka chuan, "Kan ṭhenawm state-ah BJP sorkarna hnuaiah Zo hnahthlakte'n chi leh chi intihbuaina avangin harsatna an tâwk mek a, biak-in tam tak an tichhe tawh a, chi leh chi intihbuaina ringawt ni tawh loin, kan sakhua pawh min bei tel tihna a ni. NEDA hnuaia BJP thawhpuitu kan CM chuan Zo hnahthlakte thlavâng hauhna ṭawngkam vawi khat pawh a la chhâk chhuak lo," a ti.

India ram chu ṭhuang hnih lianpuiin a kal mek nia sawiin Dr Lalmalsawma chuan, "BJP leh an thawhpuite ṭhuang khatah awmin, Hindu lal ram din a, a rang thei ang bera Uniform Civil Code min hmantir tumtute an ni. Ṭhuang lehlamah India zalenna sual chhuaktu Congress leh a thawhpuite an awm," a ti a; Congress party chu India rama hnam leh sakhaw hrang hrangte zalen taka an awm theihna tura thawk ṭhin niin a sawi.