KHAWTHLIR
Aizawl DC tur Nazuk Kumar
Aizawl DC ni lai Dr Lalhriatzuali Ralte chu School Education Director a ni dawn a, Serchhip DC ni lai Nazuk Kumar chu Aizawl DC a ni dawn. Lawngtlai DC David Lalthantluanga chu Serchhip DC a ni ang. IAS officer, DC ni mekte sîksâwi chungchangah hian Mizoram sorkarin July 10, Thawhṭanni khan hriattirna a chhuah a ni.
Khawl hman khap
Aizawl Municipal Corporation chuan thupek chhuahin, Vaivakawn Zohnuai leiminna bul hnaia in sa mek leh in sak tum tan khawl lian (heavy machinery) leh nghâwr siam thei hman khap a nih thu a tarlang. Thupek hian thu leh awm hma zawng a huam ang.
Ainawn Vengah In sak khap
Ainawn Veng, Aizawlah sorkar phalna loa in sak leh in sakna tura hmalakna reng reng phal a nih loh thu sorkar thuchhuahin a tarlang. Thupek hi June 4 & 12, 2018 leh September 30, 2019-a Council of Ministers ṭhukhawmin Ainawn Veng (Govt. Complex) chhunga sorkar ram vawnhim chungchanga thutlukna a siam tawh bawhzuina a ni a; thupek zâwm lote chu dan hmanga hrem theih an ni.
Dawr enfiah
Lunglei District Enforcement Squad for Single Use Plastic Free chuan nimin khan Lunglei Venglaia dawr 51-ah plastic aṭanga siam hman phal lohte kawl, zuar leh hmang an awm leh awm loh an endik. Dawr tam zawkah hman khat daih sarâng hmang an la tam tih an hmu a; dawr neitute chu Plastic Waste Management Rules, 2016 leh Lunglei Plastic Waste Management Bye-Laws 2023 zâwm turin intiamtir an ni.
Dragon fruit hralhna sawiho
Horticulture department Director hoin nimin khan Mizoram Dragon Fruit Farmers Association (MIDFA) hruaitute leh Delhi, Gujarat leh Punjab-a company hotute'n Mizorama thar dragon fruit-te hralh dan tur an sawiho. Ruahmanna leh harsatna awm theite an sawiho hnuah zirchianna neih leh phawt ni se, an ti.
Polling station chungchang sawiho
Serchhip District Standing Committee on Rationalization of Polling Station chu district election officer Nazuk Kumar, bawrhsap kaihhruaiin nimin khan an ṭhukhawm a, polling station siam rem leh sawn ngaite an sawiho. Rawt belh duhte tan July 19, 2023 thleng rawtna thehluh theih a nih thu an tarlang.
Tractor hlan
Lawngtlai district agriculture officer V Zamliana chuan nimin khan Chamdur Area Oil Palm Growers' Society hnenah National Mission on Edible Oils - Oil Palm (NMEO-OP) 2022-23 aṭangin tractor 35 leh trailer ton 5 a hlan. Society hnuaiah hian oil palm chíngtu 74 an awm a; tractor leh trailer man hi sorkarin 95% a tum a, loneitute'n 5% an tum a ni.
Hming hawhtir lo turin mipui ngen
Mizoram Merchant Association hruaitute leh PC party office bearer-te chu nimin khan MIMA pisaah an inkawm a; resolution siamin, "Mizorama dan loa hnam dang sumdawng tam ta lutuk hi ṭha lo kan tiin kan ngaimawh tak zet. Hnam dang dan loa sumdâwngte hi Mizo hming hawha sumdâwng an ni tlangpui hi a lungchhiatthlâk kan ti hle. Tun hnuah hnam dang sumdawngte thurualpui a, hming hawhtir tawh lo turin Mizo mipui kan ngen a ni," an ti.
Reduction sale
Synod Bookroom chuan July 10, Thawhṭanni khan Reduction Sale an ṭan a, July 22, 2023 thleng neih a ni ang. Reduction sale chhungin Synod Bookroom hmunpui, branch leh distribution center zawng zawngah bungruate 5%-80% inkara tihtlàwm a ni. Synod Bookroom hian branch 16 leh distribution centre 46 a nei a, lehkhabu item 7,500 chuangah discount an kalpui dawn a ni.
Meizial leh beer
Assam Rifles sipaite chuan nimin khan Champhai Ruantlangah Myanmar lam aṭanga lak luh meizial bawmpui 10 leh beer báwm 153 an man a, Customs hnenah an hlan. Foreign cigarette an man chu cheng nuai 13 hu a ni a, beer an man chu cheng nuai 6.06 hû a ni.
Youth-20 Meet Sports & Youth Services
department leh Mizo Zirlai Pawl chuan nimin khan district hrang hrangah 'Youth-20 Meet on Nation-alism, Patriotism & Development' prog-ramme an buatsaih ṭan. Y-20 Meet hi India ramin G-20 president nihna a chelh chhunga hmalakna pakhat a ni a, naktukah Vanapa Hall-ah hawnna inkhawm hman tur niin, chief minister Zoramthanga'n a hawng ang.