Zo thlavâng hauhna punkhawmah PM Modi leh Manipur CM lim an hâl

Zo Reunification Organisation (ZoRO) bultumin nimin khan Aizawla Transport Directorate kawtah Manipur tualchhung buainaa Zo hnahthlak harsatna tâwk mekte thlavang hauhna, tawrhpuina leh nunna chánte sùnna hun hman a ni. Prime minister Narendra Modi, Manipur chief minister N Biren Singh leh David Thiek lu tantu Mairembam Romesh Mangnag te lim hàl a ni.

ZoRO Ṭhalai vice president Michael Lalramsanga kaihhruai hun hmannaah hian ZoRO president R Sangkawia leh general secretary L Ramdinliana Renthlei ten thu an sawi. Vice president F Ngurbiakfela kaihhruaiin Manipur buainaa Zo hnahthlak thite sùnna hun hman niin, vice president Rohmingthanga Colney kaihhruaiin Manipur-a Zo hnahthlakte tan ṭawngṭai rualna hun hman a ni a, resolution pathum pawm a ni bawk.

R Sangkawia chuan, Meitei-te'n kawng hrang hrangin Zo fate an phiarru tih sawiin, "Manipur sorkar nen ṭang kawpin kan unaute an bei. Manipur buaina hian thla hnih a pêl tawh a, heti chunga India Prime Minister a ngawi reng hi kan hrethiam lo hle. India sorkar hian Zo fate hi Indian-ah min ngai lo nge tih hi ZORO zawhna a ni," a ti a, India sorkarin Zo fate a ngaihsak loh thu a sawi.

L Ramdinliana Renthlei chuan, Mizorama Meitei, thlamuang taka awm mekte chu fimkhur tura chahin, "Manipur-ah kan unaute thlabára an awm laiin Mizorama Meitei-te'n zalen takin dawr an hawng a, zalen takin khawlaiah an la léng. Mizote hi kan lo fel ta ngawt mai, kan unaute'n harsatna an tâwk zel a nih chuan kan awm mai mai dawn lo. Mizorama Meitei-te fimkhur turin ka chah a ni," a ti.

Manipur buaina chu Pathian ringtute leh ring lo mite inbeihna a nih thu leh Zo fate chu ringtute an nih avangin Pathianin a puih dawn thu sawiin Ramdinliana chuan, "Ring lo mite hi hnehin an awm dawn. Zo hnahthlakte'n Mizoramah nunau an rawn dah a, an ṭhalaite chu an khua chhanin zum leh hriam karah an duty mek. Mahni ram leh hnam chhana duty-te Mizo mipuite'n zahna chibai kan bûk. In tan kan awm reng a, in hnungah kan ding reng dawn a, a ṭul a nih chuan in hmaah pawh kan la rawn ding ang," a ti a, zâm lo turin Manipur-a Zo hnahthlakte a chah.

ZoRO tarlan danin, Manipur tualchhung buaina May 3, 2023-a a inṭan hnuah Zo hnahthlak mi 124 chuang an thi tawh a, hliam damdawi-ina awm mi 377, chin hriat loha awm mi 60 chuang an awm. Khua 290, mimal in 7,247, biak-in leh quarters 357 hâl a ni tawh. Sahimna zawnga tlanchhia mi 41,425 an awm a, ITLF Relief Camp, Lamka-ah mi 110 an awm bawk.

PUNGKHAWMTE RESOLUTION

1. Manipur tualchhung buaina vanga kan unaute'n nunna an chán a, an in leh lo an chán bawk a, chênna leh ei leh in tur tlachham ṭhahnem tak an awm hi ná kan ti a, kan tawrhpui tak zet a ni. Manipur-in a awp mek Zo fate hnam anga nuaibo an tum mekna aṭanga dam khawchhuak tura an beihnaah leh Manipur state rorelna laka la hrang tura India sorkar an ngen mek hi kan thlâwp.

2. India sorkar hian Manipur state-a awm Zo fate hi rorelna hran pe rawh se.

3. Khawvel hmun hrang hranga awm Zo fate kan insuihkawm a, lungrual taka kan awm a, rorelna pakhat hnuaia kan awm theih nan hma kan la zel dawn a ni.