KVK ram kan ṭheh dawn - Minister: Ṭan bik neiah Kolasib MJA-te a puh

Kolasib bialtu MLA K Lalrinliana, minister chuan KVK, Kolasib ram chu chhuhsak ṭhen a, Kolasib-a in hmun nei lote tan ṭheh tum a nih thu a sawi a; KVK ram ṭheh tum chungchangah Kolasib MJA-te chu ṭan bik nei (bias)-ah puhin, an awmna party nen a hriat vek thu a sawi bawk.

Minister K Lalrinliana hian nimin khan Kolasib, KVK ram, in hmun atana ṭheh tum a nih avanga perh (peg) tàrna hmun a tlawh. KVK ram ṭheh tum chungchang media-a puanzar a nih dan sawiin, Kolasib MJA-te chu ṭan bik nei (bias)-ah a puh. An awmna party nen lam a hriat vek thu sawiin, "In side a dik lo a, in opposition avangin. Eng party nge in nih kan hre vek. ZPM in ni a, chanchinbu hi a neutral tur a ni. Zêp suh u," a ti.

Kolasib-a PE department EE pakhatin department ramah a in tur a sak pawh an puanzar loh laia KVK ram ṭheh tur an puanzar bik chhan Minister chuan a hmuna kal ve Kolasib-a journalist-te a zâwt a, journalist-te chuan source an neih loh vanga puangzar lo mai an nih thu leh KVK ram chungchangah erawh source an neih vanga puang­zar an nih thuin an chháng a ni.

K Lalrinliana chuan, KVK-in an ram an luah sêng lo a, kum 30 chuang kal ta chhungin an hmang ṭangkai lo niin a sawi a, Kolasib-a in hmun nei lote tan ṭheh an tum thu sawiin, "Kolasib-ah in hmun nei lo an tam lutuk a, mipui lama kan ṭan a ngai tawh... Mipui sorkar, democracy ram kan ni a, páwngpaw ui vak chi a ni lo," a ti.

KVK ram lo chu hmun dang ṭheh tur a váng nia sawiin Minister chuan, "Research tihna atan in hmang duh a nih chuan a aia hláah ram kan la ngah a, kan pe zel ang che u," a ti. KVK ram chu dan loa chhuhsak an tum lo a, dan anga neihsak an tum nia sawiin, "MNF party tana ti tur kan ni lo a, mipui, in hmun nei lote tana pe tur kan ni. Inthlan pawha kan policy a ni a, mipuiah kan manifesto kan tarlan a ni," a ti bawk.

Minister K Lalrin­liana chuan, Kolasib VC president a nih laiin Bawktlang leh Tuiṭha Vengah Forest depart­ment ram an chhuhsak tawh thu leh tunah Soil department ram pawh mi 150 len theih nan an chhuhsak tawh thu a sawi a, "Sub-Station chhungah EE-in concrete building a sa ngawt a, department head-in ama tana a sa a nih chuan eng nge mipui pawhin kan sak ngam loh ang?" a ti a; Project Vengah pawh in hmun ṭheh tur mimal ram an lei tawh thu sawi.

Kolasib MLA chuan, KVK ram chu miin an vât a nih pawhin hrethiam turin KVK-a thawkte a chah a, "In an la sa lo hi in vannei lutuk. Soil department rama mite pawh pass an neih hmain in an sa vek," a ti.

Minister-in KVK ram ṭheh tum a tlawhnaah hian KVK nodal depart­ment Agriculture additional secretary Lalruatsanga, deputy director F Lalmalsawma leh executive engineer Lalchhanhima te pawh an tel a ni.