Minister-in GAC hostel pahnih a hawng; College 19-in NAAC accreditation nei mek

Higher & Technical Education minister Dr R Lalthangliana chuan nimin khan Government Aizawl College campus, Mualpuia mipa leh hmeichhe hostel sak belh a hawng a; Mizorama college 19-in NAAC accreditation an nei mek tih a sawi.

Hostel sakna atan hian RUSA 2.0 aṭangin Rs 1,60,00,000 ruahman a ni a, September 2019-ah sak ṭan niin, May 31, 2021-ah sak zawh a ni. Hostel building pahnihte chu lirnghing lakah pawh him thei ang ber tura duan a nih thu an tarlang.

GAC principal Lalbiakzuala kaihhruai hostel hawnna inkhawmah Dr R Lalthangliana chuan, Mizorama college 23 zinga 19-in National Assessment and Accreditation Council (NAAC) accreditation an nei mek tih sawiin, college pali erawh chu accreditation nun hun chhung a tàwp rih tih a sawi a, "Mizoramah UGC hnuaiah recognised college 23 a awm a, a lawmawm em em; insiamṭhatna tur leh hmasawnna tur erawh tam tak a la awm," a ti.

HTE Minister chuan, NAAC accreditation-ah Mizoram chu India ram pumah higher education-ah pakhatna a nih thu sawiin, "AISHE Report (2020-2021)-ah khan Mizoram chuan 71% a hmuh laiin, kumin July thlaah chuan 83%-ah a kai a, ram pum NAAC accreditation-ah ti ṭha ber a ni ta a ni," a ti a; Mizoram dinhmun chu chhuanawm a tih thu a sawi.

Dr R Lalthangliana chuan, GAC chu kumina Mizoram University hnuaia BA result-ah pass percentage nei ṭha ber a ni te, student enrolment sang ber pahnihna a ni leh campus ṭha tak an nei chho mek chu a lawmpui thu a sawi a; hmasawn zel tum turin college hotute leh zirlaite a chah.

Sorkar laipuiin zirna tihhmasawn nan rua­hmanna tharte a siam reng tih sawiin Minister chuan, "RUSA 1.0 leh RUSA 2.0 kan hmang zo tawh a, tunah hian RUSA 3.0 hman theih turin buatsaih leh mek a ni," a ti.

HTE Minister chuan RUSA 3.0 hmang turin central university leh college-te inkara affiliating system hman ṭhin tihtawp a ni dawn tih sawiin, "Tuna Mizorama central university kan neih chhun MZU pawh research tan bik chauh hman thuai a nih hmel avangin, Mizoramin ama puala state university a neih a ngai dawn," a ti a; state university nei lo tan chuan RUSA leh higher education atana scheme dangte aṭangin sum dil/hmuh theih a nih dawn tawh loh avangin state university din a nih thuai theih nan Mizoram sorkarin chak taka hma a lak dawn thu a sawi bawk.