Mizoram EFCC minister TJ Lalnuntluanga'n Mizoram mamawh Union Minister a sawipui

Environment, Forest & Climate Change (EFCC) minister TJ Lalnuntluanga chuan nimin khan sorkar laipuia EFCC minister Bhupender Yadav chu New Delhi-a a pisaah a kâwm a, Mizoram mamawhte a sawipui.

Sorkar thuchhuah tarlan danin, TJ Lalnuntluanga hian EFCC department hnuaia sum táng (fund pending) hrang hrang - wildlife protection squad-te hlawh tur, CSS - Integrated Development of Wildlife Habitat (IDWH) hnuaia thawkte hlawh turte pe thuai turin Bhupender Yadav a ngen.

Mizoram EFCC department kaltlanga hmasawnna ruhrel thawh hrang hrang te, Project Tiger hnuaia sum pek tawh loh chungchang leh Satellite Wildlife Rescue Centre, Champhai Tlang­sama dinna tur pawm tawh, sum la pek chhuah lohte pek chhuah thuai a nih theih nana hmalakpui turin a ngen bawk.

Union EFCC minister Bhupender Yadav chuan, TJ Lalnuntluanga thu thlen hrang hrangah hmalak nghal a nih tur thu a lo hrilh a; Murlen National Park leh Phawngpui National Park-a thawktute hlawh, nikum aṭanga táng tawh chu chinfel thuai a nih theih nan sanction order a siamtir nghal.

Bhupender Sing chuan, National Wildlife Park pahnih chhunga Wildlife Habitat siamna tur leh hmasawnna hna thawhna tur hrang hrangah pawh sum sanc-tion order a siamtir nghal bawk.

Champhai Tlangsam-a Satellite Wildlife Rescue Centre dinna tur pawm tawh chu financial sanction a nih theih nan Technical Committee-in August thla chawlkar hmasa berah an ngaihtuah nghal tur thu Union Minister chuan a sawi.

EFCC department-in wildlife crime hrang hrang dona atana Wildlife Protection Squad dinna tura ruahmanna a thehluh chu an pawm nghal thu leh khawpui hmun 14-a ngaw humhalhna tur project siam pawh pawm nghal a nih thu Union Minister chuan a sawi bawk.