Union minister Shobha Karandlaje-i'n CVScAH-ah BSL-II laboratory a hawng

Sorkar laipuia Agriculture & Farmers' Welfare minister of state Shobha Karandlaje chuan nimin khan Selesiha College of Veterinary Sciences & Animal Husbandry a tlawh a, bio safety level-II laboratory (BSL-II) leh Mushroom Spawn (Seed) Production Unit a hawng.

Union Agriculture Minister hian KVK-in CVScAH-a exhibition an buatsaih a en a; PM Kishan Scheme hnuaia kut hnathawktute nen an inkâwm bawk a, loneitute harsatna tawh chi hrang hrangte ngaithlain, a ṭul anga a bawhzui tur thuin a chháng. Mizorama loneitute tan hmunhma zau tak neih a har avangin thlai leh thei an chìn bakah, ran vulh tel ṭhin ni se awmzia a neih a beisei thu a sawi.

Shobha Karandlaje chuan, prime minister Narendra Modi-a'n lonei-tute/kut hnathawktute a ngaih pawimawh ber thu leh an hmasawnna tur scheme tam tak ruahman a nih thu a sawi a, "Khawvelah thlai chi hrang hrang eng emaw zat leh bawnghnute thawn chhuak tam ber kan ni. Hetih rual hian, India rama chengte ei leh bâr hnianghnar taka kan la intodelh thei lo hi kan vei em em a ni," a ti.

Union minister Karandlaje chuan, Mizoramah mihring chêng an tam loh avangin ei leh bàra intodelh a harsat loh a rin thu sawiin sorkarin kut hnathawktute tana ruahmanna a siamte ngaihven turin a chah a; Champhaiah loneitute a kawm thu sawiin, an hamṭhatna tura sorkar laipui scheme hrang hrangte an hriat lohzia a hmuhin pawi a tih thu a sawi bawk.

Union Minister chuan, CVScAH zirlaite chu an zirlaiah taima tura chahin, an thiamna zir chhuahte kut hnathawktute hnen thlentir ngei turin a chah a; an thiamnate kut hnathawktute'n hmasawnna atan an chhawr ṭangkai loh chuan an thiamnain awmzia a neih dawn loh thu a sawi.

Mizoram Agriculture minister C Lalrinsanga pawhin thu sawiin, Central Agriculture University, Imphal hnuaiah Mizoramah CVScAH bakah, Thenzawlah Horticulture College din a nih thu leh chu'ngte chu Mizoramin hma a sawnpui thu a sawi a; CVScAH-a BSL-II leh Mushroom Spawn (Seed) Production Unit-te chu Mizoramin thlai, thei rah leh ranvulh lamah hmasawnna thar a neih phah ngei a beisei thu a sawi bawk.