Lawngtlaiah phûl lem phah hawng

Sports & Youth Services (SYS) minister Robert Romawia Royte chuan nimin khan Lawngtlai Vengpuiah YLA Khelmual tihchangtlun leh phûl lem phah thar a hawng a; MSSC Lai Cup 2023 (Inter-Branch YLA Football & Volleyball Tournament) a hawng nghal bawk.

Lawngtlai Vengpui YLA Khelmual tihchangtlunna leh phûl lem phahna atan hian Ministry of Minority Affairs hnuaia PMJVK Scheme 2020-2021 aṭangin cheng nuai 1,005.34 hmuh a ni a; hna thawktu contractor chu Decor India, Guwahati a ni.

Robert Romawia Royte chuan, Lawngtlai district-in infiamnaah hma a sawn theih nan sorkarin hmalakna tam tak a kalpui mek thu a sawi a, "Tun sorkarah Mizorama infiamna ruhrel tihchangtlun nan Mizoram budget piah lamah sorkar laipui leh agency hrang hrang aṭangin hmasawnna hna thawhna tur sum ṭhahnem tak hmuh a ni a, a hlawhtlinna pawh kan hmu zel a ni," a ti.

Sports Minister chuan, sorkarin ṭhalaite leh infiammite ngai pawimawha hma a laknate'n rah ṭha zawk a chhuah theih nan ṭhalaite'n theihtawp an chhuah a, ruihhlo laka an inthiar fihlim a ṭul thu a sawi bawk.

Phûl lem phah thar hawnnaah hian MLA pathum - H Biakzaua, Lawmawma Tochhawng leh Dr K Pachhunga te, Lai Autonomous District Council chief executive member V Zirsanga te pawhin thu an sawi.

MSSC Lai Cup 2023-ah hian football-ah YLA branch 40 leh volleyball-ah YLA branch 11 an tel a ni.