Rahul-a thlavâng hauhin an pungkhawm

Congress party chuan nimin khan Congress Bhavan tualah BJP sorkar laka Rahul Gandhi thlavâng hauhna punkhawm, Silent Protest an huaihawt a; Kristianna leh Mizo hnam himna atan BJP sorkar paihthla turin Mizo mipui thlàwpna an ngen.

Silent Protest hi Rahul Gandhi laka BJP sorkar chêt an duh loh lantirna a ni a, thusawi a awm lo a, kal khawmte’n puan dumin an hmui an tuam a ni.

MPCC chuan, Rahul Gandhi chu BJP thahrui chhu chat turin hruaitu chak leh ropui a ni chho mek nia sawiin, "Narendra Modi leh sumdawng hausa Adani ten mipui rawk tura sam an inphiar zawm dan vawi tam tak a lo aupui tawh a, hei hi BJP sorkarin an huat em avangin Rahul Gandhi-a jail-a a tàn theih nan leh MP aṭanga bàn a nih nan mawi leh mawi lo pawh sawi loin a lakah râwng takin hma an la. Rahul Gandhi chu thubuai phuahchawp tak neih tirin, MP a nihna aṭangin an bàn a ni," an ti.

Congress party chuan, nasa taka harsatna an siam hnuah pawh Rahul Gandhi-a'n BJP sorkara rorelna dik lo a aupui zel a, India mipui tan a inhlan ral ngam tih an sawi a; huaisen taka BJP sorkar hmachhawn zel a tum avangin eptu party lian eng emaw zat chu kum 2024 inthlanpuia BJP paih turin thawhho an tum niin an tarlang.

BJP-in kum 2014 aṭanga sorkar laipuia thuneihna an chan hnuah Kristiante'n nêkchêpna an tâwk nasa nia sawiin MPCC chuan, "Kristiante tana dan sakei Uniform Civil Code (UCC) barh luih tuma hmalakna a kal mek. Manipur state-ah awmze nei takin biak-in 300 chuang tihchhiata hâl a ni tawh. Hetiang khawpa Kristiante'n harsatna kan tawh avang hian kan sakhua leh kan hnam himna atan BJP sorkar paihthla turin Congress party chuan Mizo mipui thlàwpna leh thawhpuina kan ngen a ni," an ti.