RD hnuaia scheme hmalakna sawiho

Rural Development (RD) minister Lalruatkima hoin nimin khan RD department hotute Woodland Hill conference hall-ah an ṭhukhawm a, Rural Development hnuaia scheme-te kalpui dan leh chak zawka kalpui dan tur an sawiho.

Minister chuan, RD department chu thingtlang mipui chàwikànna atana department pawimawh ber leh thingtlang mite ta deuh bik a nih thu sawiin, "Officer lian aṭang hna hniam zawk thawktu thlengin mi hawihhâwm leh thingtlang, mite tana dàwr nuam ni chhunzawm zel ang u," a ti a, BDO-te chu an awmna bialtu MLA-te nen inlaichìnna ṭha nei turin a chah.

Lalruatkima chuan, RD department hnuaiah scheme pawimawh tak tak kum nga chhungin kalpui a ni tih sawiin, "Ni 100 inhlawhna phei chu India ramah 100% kalpui thei awm chhun state kan ni a, hei hi hlawhtlinna a nih bakah, hripui a lên lai pawha chhuanchham awm loa chhungkaw tam tak kan awm theih phahna a ni," a ti.

RD Minister chuan, RD department a enkawl chhunga department tihchangtlunna leh mipui tana ṭangkai hlawhtlinna an neihte a sawi a, "Department chhung bikah DRDA ṭhiah taka officer leh staff 87-te a ngheta dah an ni a, project director, DRDO post MCS officer JAG post atana rin luhte pawh hlawhtlinna langsar tak a ni," a ti. RD block kilkhâwr zawk leh Aizawl aṭanga hla deuhahte panchayati house eng emaw zat sak tawh leh sak mek a awm thu a sawi bawk.

Ṭhutkhawm hi RD secretary R Zarzosanga'n a kaihruai a, scheme project director, DRDO leh BDO-te an tel a ni.