Manipur ráltlânte dawngsawng turin Mizorama VC-te an inhuam

All Mizoram Village Council Association (AMVCA) chuan, Manipur buainaa harsatna tawk, sahimna zawnga Mizorama lut Mizo hnahthlakte dawngsawng turin Mizorama VC zawng zawng an inhuam thu an tarlang.

AMVCA hi nimin khan Tlangnuam BDO Office conference hall-ah an ṭhukhawm a; resolution siamin, Manipur-a Zo hnahthlakte'n harsatna tâwk a, mi eng emaw zat an thi te, biak-in hàl a ni te, in leh lo tam tak an chánte chu pawi an tih thu leh Manipur sorkar an dem thu an tarlang.

AMVCA chuan, "Harsatna a thlen tak avang hian Mizo hnahthlak, Manipur aṭanga sahimna zawnga Mizorama rawn kalte lo dawngsawng tur hian Mizoram chhunga VC zawng zawngte kan inhuam em em a ni," an ti.

Sorkar laipuiin Uniform Civil Code hman tuma hma a la mek chu ṭha lo an tih thu tarlangin, "Mizoram sorkarin UCC hman a nih lohna tura hma a lakna kan thláwp tlat a ni," an ti bawk.