Leilung chanchin zirho a ni

Disaster Management & Rehabi­litation minister Lalchamliana chuan nimin khan Pachhunga University College (PUC) seminar hall-ah lei chhung chanchin leh a kaihhnawih thiamna hman ṭangkai dan zirhona, 'International Workshop on Geodynamics and Advances in Geophysical Methods for Exploration and Geohazards' a hawng.

DMR Minister chuan, zirhona chu Mizoram dinhmun leh leilung awm dan enin thil ṭangkai tak a nih a beisei thu a sawi a, "Science zir zelna leh zirbingna lamah thil ṭangkai tak, thiamna inṭâwm thei hmanraw ṭha tak a ni thei a, hei hi scientific research pawhin a tum pawimawh tak a ni," a ti.

Zirhona hi PUC-a Department of Geology & Geophysics leh Zirtiri Residential Science College-a Department of Geology buatsaih a ni a, vawiinah chhunzawma zawh a ni ang. Geology leh geophysics lama thiamna nei mithiam 12-te lehkha ziah zirho a ni.