KHAWTHLIR

Manipur raltlan 12,473 awm mek

Manipur buaina vanga sahimna zawnga Mizo­rama lut nimin tlai dar 5 thleng khan mi 12,473 an awm. Mi 12,473 zinga 2,893 chu relief camp 37-ah an khawsa a, mi dang 9,580 chu hmun dangah an awm thung. Manipur raltlan awm tamna ber district - Kolasib-ah mi 4,419 an awm a, Aizawl district-ah mi 4,219 leh Saitual district-ah mi 2,940 an awm bawk.

EVM demonstration

Aizawl DC pisaah nimin khan kumin MLA inthlanpui awm tura inbuatsaihna atan electronic voting machine hmanga vote thlak zirna, EVM Demonstration Centre hawn a ni a, a duh apiang tan vote thlak chhin theih a ni. Centre hi DRDO Office, New Capital Complex, Aibawk BDO pisa leh Darlawn BDO pisaahte pawh dah a ni dawn a, inthlan puan hma zawng kalpui tur a ni.

Election training

Lawngtlai district election officer David Lalthantluanga, bawrhsap chuan nimin khan DC conference hall-ah kumin MLA inthlanpui lo awm tura sector officer leh venhimna lam thawktute tana buatsaih training a hawng. Lawngtlai district-ah hian MLA bial pathum a awm a, bial pathumah hian polling station 181 awmin, polling station-te chu sector 29-ah ṭhen a ni.

Lei zawh phal chin

Sairang leh Tuipuibari inkara lei (bailey bridge) pathum - Dampa lei, Damparengpui lei leh Ansuri leite chu a hlui tawh a, thawm ṭhat a nih dawn avangin Mamit SP Lalthangpuii Pulamte chuan lirthei metric ton 24 aia rit phur tan zawh khap a nih thu a tarlang. Thupek hian thla khat a huam dawn a, thupek zâwm lote chu MV Act hmanga hrem theih an ni.

ASUTP zirho

Nimin khan MRB auditorium-ah tun aṭanga kum 20 chhunga Aizawl khawpui ṭhan dan mila mipui chet vel leh veivahna awlsamna tura ruahmanna siam, Aizawl Sustainable Urban Transport Project (ASUTP) chungchang zirhona buatsaih a ni a, Finance secretary Vanlalchhuanga'n a hawng. Hawnna hi UDPA secretary Lalmalsawma Pachuau-in a kaihruai a, thupui chu 'Finalise scope and work plan for feasibility studies for identified projects' tih a ni.