Sorkara thawk nghet doctor awm lohna Mizoramah sorkar damdawi-in 19 a awm

March 31, 2023 dinhmun angin, Mizoram sorkar damdawi-in zinga primary health centre (PHC) 19-ah sorkara a ngheta thawk doctor an awm lo a, PHC dang pathuma doctor awm chhunte'n specialist (post graduate) an zir mek avangin chu'ng PHC pathumah chuan sorkar doctor an awm lo bawk.

RTI Act tlawhchhana zawhna Health & Family Welfare department-in an chhàn danin, March 31, 2023 dinhmun angin, sorkara a ngheta thawk (regular) doctor awm lohna PHC 19-te chu Directorate of Health Services hnuaia mi vek a ni a; hetih lai hian, PHC dang pathum - Lungsen, Cherhlun leh Phúrà PHC-a doctor awm chhun nia tarlante chu PG an zir mek avangin heng damdawi-in pathumah hian doctor an awm rih loa ngaih theih a ni.

Sorkar damdawi-in dang 33-ah sorkara a ngheta thawk doctor pakhat ṭheuh an awm a, chu'ng zingah chuan community health centre (CHC) pahnih - Chawngte CHC leh Kawrthah CHC a tel.

DHS hnuaia damdawi-in - sub district hospital, CHC leh PHC hrang hrangah sorkara a ngheta thawk MBBS doctor 81 an awm a, dental surgeon doctor pasarih an awm bawk. MBBS doctor 81 zinga 21 chuan PG an zir mek.

CHC zingah a ngheta thawk doctor awm lohna pakhat - Sakawrdai CHC a awm a; PHC zingah doctor pakhat aia tam awmna 11 a awm a, mahse, PHC tina doctor zingah PG zir mek an awm vek avangin a taka doctor thawk pakhat ṭheuh an awm.

DHS hnuaia damdawi-in (SDH, CHC leh PHC) zinga doctor thawk zat tarlanah hian a ngheta thawkte chauh tarlan a ni a; centrally sponsored scheme hnuaia thawk an awm leh awm loh tarlan a ni lo.

Directorate of Hospital and Medical Education (DHME) hnuaiah sorkar damdawi-in 11 awmin, doctor 251 an awm a, chu'ng zinga 194 chu Mizoram sorkara a ngheta thawk niin, 57 chu a nghet loa thawk an ni a, a nghet loa thawkte chu state contract, NHM, AYUSH leh MSACS hnuaia thawkte an ni.