Rajya Sabha MP Vena'n UCC a dodâl thu Law Commission of India-ah a thlen

Mizoram Rajya Sabha MP K Vanlalvena chuan nimin khan Law Commission of India hnenah lehkha thawnin, Uniform Civil Code (UCC) hman tumna a dodal tlat thu a thlen.

K Vanlalvena chuan a lehkha thehluhah hian Mizoram chu British kuta a luh hmain kum tam tak mahnia ro inrêl a nih thu a tarlang a, "British awpna hnuaia kum 57 chhung a awm lai pawhin India ramah a tel ngai lo. British lak aṭanga India independence sual lai zawng zawng pawhin Mizoram chu India-ah a tel ve lo," a ti.

Kum 1947-a India ram a pian hnuah Mizote awm dan tur chingfel hmasa loa British hoin an chhuahsan avangin Indian Constitution-ah pawh tarlanna awm loin Mizoram chu India-ah a bet nia tarlangin Vanlalvena chuan, "Hei vang hian kum 20 lai MNF-in India ram aṭanga zalenna a sual a ni," a ti a; India leh MNF-te'n inremna ziakin, Indian Constitution Article 371(G) chu Mizoram venhimna bik atan siam a nih tâk thu a ziak.

MP K Vanlalvena chuan, India ramah UCC hman a nih chuan Article 371(G) a khawih pawi theih thu ziakin, "Chutah chuan Mizote humhimna hrang hrang - ram neitu nihna te, Mizo sakhua leh vantlang nun te, Mizo hnam dan leh nunphung humhimna chungchangte a inziak. UCC hian heng Mizo hnam himna dante hi a tihchhiat theih dawn avangin na takin ka dodal a, hmarchhaka tribal hnam hrang hrangte tan pawm theih a ni lo," a ti.

India ramah UCC hman chi a nih leh nih loh zirchianna tunlai hian Law Commission 22-na chuan a kalpui mek a; June 14, 2023 aṭanga chhiarin ni 30 ral hmain Law Commission hnenah ngaihdan thehluh theih hun hawn a ni.