Hlêprûkna laka fihlîm MLA ni turin ZPM aṭanga bial viltute an intiam

ZPM party-in Legislative Assembly inthlanpui awm tura bial vil tura an ruatte chu July 11, 2023 khan an inhmu khawm a, MLA an nih hunah hlêprûkna (corruption) laka fihlîm ni turin an intiam.

ZPM party aṭanga bial viltute hi L&B Resort-ah intuaitharna hun hmanpui an ni a, an chief ministerial candidate Lalduhoma bakah, vice president pahnih Rev. Dr K Thanzauva leh Dr Kenneth Chawngliana leh, general secretary Dr KC Lalmalsawmzauva te an tel. Bial viltute chu inthlanpuiah thlan tlin an nih a, MLA an nih pawhin hrèprûkna laka fihlim MLA ni turin bán pharin an intiam a ni.

ZPM thuchhuah tarlan danin, intuaitharnaah hian bial viltute chuan April 2023 leh tun inkara an bial vila hmasawnna leh harsatnate an sawiho a; ZPM thil tum an aupui mek zingah 'Bána kaih policy' leh thlai thar hralhna rate siam chu ṭhalaite leh loneitute'n an tuipui thu te, 'Kalphung thar, mipui sorkar' chu mipuiin an nghahhlelh tawh thu te, kawlphethaa intodelh thuai turin mipui beiseina a sàn thute an sawi.

A thlàwna sem policy chu mipuiin an hnâwl tawh avangin vote thlâk dawnah sum semin awmzia a neih an rin loh thu te, mipui khawngaih vote dawng turin tih tak zeta inngaihtlàwm a pawimawh thute an sawi bawk.