MJA ṭawng khum dan vangin ngaihdam dil turin Minister phût

Congress ṭhalai, Mizoram Pradesh Youth Congress Committee (MPYCC) chuan thuchhuah siamin, minister leh Kolasib bialtu MLA K Lalrinliana chu MJA, Kolasib district member-te a ṭawng khum dan avanga ngaihdam dil turin an phût.

MPYCC chuan, K Lalrinliana'n July 12, Nilainia KVK, Kolasib ram ṭheh tum chungchangah MJA, Kolasib district-te chu ṭan bik nei (bias)-ah puhin, Kolasib-a journalist-te chu an awmna party nen lam a hriat vek thu leh an awmna party hming a sawite chu mak an tih thu leh pawi an tih thu an tarlang a; Kolasib journalist-te thlavâng an hauh tlat tih an sawi.

KVK, Kolasib ram ṭheh tum chungchanga thil fel tâwk lo awm nia langah Kolasib-a journalist-te hmalakna an thlàwp tlat thu sawiin MPYCC chuan, "Mawi lo taka journalist kan neih chhuanawm tak takte mipui hmaa cabinet minister Pu K Lalrinliana'n a ṭawng khum avang hian ngaihdam dil ngei turin kan phût a ni," an ti.

Congress ṭhalaite chuan, Mizorama journalist-te'n thu dik hai lang tura hma an lakna avanga mawi lo leh dik lo taka ṭawng khuma sawichhe duhtu Mizoramin minister leh MLA a neih tawh zingah an awm an la hre ngai lo tih an sawi a, "Pu K Lalrinliana hian a tih loh tawp tur a tih bakah, KVK, Kolasib ram ṭheh tum chungchangah hian dik lo taka thil tih tum a nei tih a tilang chiang hleah kan ngai," an ti bawk.

MPYCC chuan, June 27, 2023-a ZPM leader Lalduhoma Guwahati-a kal, a tuk June 28-a a haw leh nghal chungchangah thil rinhlelhawm tak a awm nia ngaiin, sawifiah turin Lalduhoma an phût.

MPYCC chuan, ZPM Leader-in Guwahati a pan ní, June 27-ah thlawhnaa chuang ve BJP Minority Morcha National Secretary nen Guwahati airport-ah lirthei vár a lo hmuak niin an tarlang a, "An pahnihin lirtheiah chuang dunin, airport aṭangin an kalna tur hmun panin an kal ni àwmin a hmuna awmte sawi a awm. North East Democratic Alliance convener leh Assam CM Himanta Biswa Sarma hmu tura kal an ni tih thâwm rîvâ kan hre leh zel hian ngaih a tiṭha lo hle a ni," an ti.