Sorkar quarters ṭhiah tumna sût turin PC-in sorkar an ngen

Peoples' Conference party hruaitute chuan an president Vanlalruata hoin nimin khan Ainawn Veng (Govt. Complex)-a sorkar quarters-te an en a; quarters ṭhiah tum zinga a tam ber chu kum eng emaw zat la luah tlak nia an ngaih avangin sorkarin ṭhiah a tumna chu sût an duh thu an tarlang.

PC President chuan, "June 22, 2023-a sorkarin quarters luahtute chhuak tura a tihna hi quarters building-te a hmuna kan enfiah vek hnuah thil ṭul lo tawp a nih avangin order hi sût lehnghal turin sorkar kan ngen a ni," a ti.

Quarters ṭhiah tura tih 47 zingah ṭhiah ngai chu pahnih khat bâk a awm lo nia sawiin Vanlalruata chuan, "Quarters-ah hian chhungkaw 180 vel an chêng mek a, quarters luah manah kum tin sorkarah cheng nuai 100 vel a lut ziah. Quarters ṭhiah tumte hi sak ṭhat tumna a awm miah lo," a ti a; Sorkar hmalakna chu PC party-in an dem thu a sawi bawk.