Labour Court din vat turin sorkar ngen
National Trade Union of Mizoram (NTUM) chuan hnathawktu dinhmun hniam zawk muster roll/casual employee/private establishment-a thawktute chanvo humhim a nih theih nan Labour Court din thuai turin sorkar an ngen.
NTUM hruaitute'n nimin khan Aizawl Press Club-ah thuthar thehdarhtute an kâwm a; an president C Remtluanga chuan, hnathawktu dinhmun hniam zawkte tan Labour Court a pawimawh thu sawiin, "Sorkar hmasaah kan nawr tawh a, tun sorkarah pawh kan thlen tawh. Tun thlengin Labour Court hi Mizoramah din a la ni lo a, din thuai turin sorkar kan ngen a ni," a ti.
Mimal hnuaia thawk zawng zawng NTUM hmalaknain a huam vek thu sawiin C Remtluanga chuan, "Hnathawktute chanvo pek theihna dan chi hrang hrang hman a nih theih nan hmalak mek a ni a, hnathawktute pawhin an chanvo humhalhna dante ngaihven nachang an hriat thar a ngai. Private hnuaia thawkte tan Employees' State Insurance (ESI) hman theih sa reng a ni a, mimal sumdawnna neitute hian an hnuaia thawkte'n hamṭhatna an chhawr ngei theih nan ESI zawm turin kan phût a ni," a ti a; ESI chu thawktu mi 10 leh a aia tam chhawr tan zawm ngei tur a nih thu a sawi.
NTUM hruaitute chuan, kum 2020 khan muster roll (MR) 8,000 chuang sorkarin provisional employee-ah a hláng kai a, sorkar chhinchhiah danin MR 3,365 an la awm mek thu an sawi a, "Tuna MR awm mekte hi povisional employee an nih ve theih nan sorkarah dil mek a ni. May 18, 2023-a Cabinet-in a pass zingah dawr neia sumdawng hnuaia thawkte hlawh hniam ber tur minimum wage zat bitukna, The Shop and Establishment Act chu tun thlengin notification tihchhuah a la ni lo," an ti.