Agriculture leh a kaihhnawih thilah Mizoramin theihna ṭha tak a nei - CM
Chief minister Zoramthanga leh International Fund for Agricultural Development (IFAD) hotute chu nimin khan Chief Ministers' Office-ah an inkâwm a, Mizorama agriculture tihhmasawn dan tur an sawiho. Chief Minister chuan, "Agriculture leh a kaihhnawihah Mizoramin potential (theihna) ṭha tak a nei," a ti.
CM Zoramthanga chuan, agriculture leh a kaihhnawih thilah Mizoramin theihna ṭha tak a neih thu sawiin, "Kan ramin theihna a neihte hi a ṭangkai thei ang bera hai chhuah a, mipuiin hlâwkna an tèl theih nan hmalak thiam a pawimawh. IFAD hmalakna hian kut hnathawktute tan hamṭhatna a thlen ngei ka beisei," a ti a; IFAD nen thawhhona ṭha neih zel a duh thu a sawi.
IFAD country director Ulac Demirag chuan, khawsak harsate puih a, an khawsak phungin hma a sawn theihna tura eizawnna ngêlnghet zawk an neih theih nan zirtir leh puih chu an tum ber a nih thu a sawi a, "Mizoramah agriculture behchhana mahni kutkawih eizawnna lama tui leh remhria tam tak an awm a, an hlawhtlin theih nan mimal chauha an tih theih lohte tihsak turin FOCUS project leh sorkar an thawhho a pawimawh," a ti.
IFAD bultumin Mizoramah FOCUS Project kalpui a ni a; Chief Minister hnenah hian hma an lak dan leh harsatna an tawhte an thlen. Chief Minister chuan sorkarin theihtawp a chhuahpui tur thu a hrilh.
FOCUS Project hian IFAD fund hmangin hna a thawk a, Mizoram leh Nagaland-ah kalpui niin, Society for Climate Resilient Agriculture in Mizoram (SCRAM) chu implementing agency a ni.
Mizoramah chuan depart-ment pali - Agriculture, Horticulture, Land Resources, Soil & Water Conservation leh Animal Husbandry & Veterinary department-te thawhhona hnuaiah FOCUS Project kalpui a ni a, Agriculture department chu nodal department a ni. Champhai, Kolasib, Serchhip, Mamit, Saitual leh Khawzawl district-a khaw 300-ah chhungkua 42,797-te'n FOCUS kaltlangin hamṭhatna an dawng tawh.
FOCUS Project-in a tum pawimawh pakhat chu - zàwi zãwia lo vah leh hâl, tlang ram loneih kalsan a, sik leh sa mila thlai kumhlun hmanga loneitute sum deh chhuah tihpun a ni a; chumi tihlawhtling tur chuan Farmers Interest Group (FIG) din a ni.
MIZORAMA FOCUS HMALAKNA
* Khaw 20-ah IFS (CADA) kalpui mek a ni a, ram tichereu lo leh ngêlnghet taka huan kumhlun nei thei turin hmalak a ni.
* Terrace siam, tui khuah, tui lâk leh tui dah khâwlna leh kawng siamahte hma an la.
* Vawk, ar, sial leh kel vulhahte hmalak a ni.
* Innovation fund-ah ṭhalai mithiam, bul ṭanna nei lote ṭanpui a ni.
* Kut hnathawktu chhungkaw 15-te'n Mat lui an kal kaina turin suspension bridge dawh a ni.
* FOCUS kalpuina district parukah suspension bridge 30 dang chhungkaw 400 vel tan siam leh tura hmalak mek a ni.
* Kut hnathawktute'n awlsam zawka an thlai thar an phurh chhuah theih nan Serchhip leh Khawzawl district-ah Agriculture Horticulture link road km. 23-a thui siam tum mek a ni.